दोस्रो चरणको चुनाव : प्रदेश १ का २१ क्षेत्रमा यस्तो हुन सक्छ भिडन्त

सोमबार, २० कात्तिक २०७४, १६ : ४६

दोस्रो चरणको चुनाव : प्रदेश १ का २१ क्षेत्रमा यस्तो हुन सक्छ भिडन्त

सोमबार, २० कात्तिक २०७४

काठमाडौँ– पहिलो चरणमा १ नम्बर प्रदेशका ७ जिल्लामा र दोस्रो चरणमा पनि ७ जिल्लामा चुनाव हुँदैछ । पहिलो चरणमा मङ्सिर १० गते प्रदेश १ का सोलुखुम्बु, सङ्खुवासभा, भोजपुर, ओखलढुङ्गा, ताप्लेजुङ, पाँचथर र खोटाङमा चुनाव हुँदैछ । दोस्रो चरणमा यो प्रदेशका इलाम, तेह्रथुम, धनकुटा, उदयपुर, झापा, मोरङ र सुनसरीमा चुनाव हुँदैछ । यिनै जिल्लामा स्थानीय तहमा दलहरूले पाएको मतको अवस्था के थियो ? आसन्न चुनावका लागि यो अङ्कगणितमाथि दल, उनका कार्यकर्ता र मतदाताको चासो छ ।

यही क्रममा हामीले स्थानीय तहको चुनावलाई आधार मानेर दोस्रो चरणमा प्रदेश १ का २१ क्षेत्रमा कस्तो चुनावी भिडन्त हुन सक्छ भनेर आँकलन गरेका छौँ ।

१) इलाम
प्रदेश नम्बर १ को इलाममा मङ्सिर २१ गते दोस्रो चरणमा प्रतिनिधि सभा तथा प्रदेश सभाको निर्वाचन हुँदैछ । इलाममा प्रतिनिधि सभा निर्वाचनका लागि दुई र प्रदेश सभा चुनावका लागि २ निर्वाचन क्षेत्र रहेका छन् ।

क्षेत्र नं. १
इलाम क्षेत्र नं. १ मा आगामी प्रतिनिधि सभा निर्वाचनमा वाम गठबन्धनबाट एमालेका नेता झलनाथ खनाल, नेपाली काङ्ग्रेसका भुपेन्द्र कट्टेल र सङ्घीय समाजवादी फोरमका राजकुमार राईबीच प्रतिष्पर्धा हुँदैछ । यो क्षेत्रअन्तर्गत सन्दकपुर गाउँपालिका, माईजोगमाई गाउँपालिका, सुर्योदय नगरपालिका, रोङ गाउँपालिका र माई नगरपालिकाका वडा नं. १, २, ३, ४, ५, ९ र १० तथा इलाम नगरपालिकाको वडा १० पर्छ ।
गत स्थानीय तहको निर्वाचनमा राजनीतिक दलले पाएको मतका आधारमा इलाम क्षेत्र नं. १ मा दलले पाएको मतका आधारमा यस क्षेत्रमा रहेका दलहरूको अवस्थाको हामीले विश्लेषण गर्ने प्रयास गरेका छौँ ।

इलाम क्षेत्र नं. १ मा स्थानीय तहको निर्वाचनमा नेपाली काङ्ग्रेसले २४ हजार २ सय ७६ मत ल्याएको छ भने नेकपा एमालेले ३१ हजार ८ सय ४६ मत ल्याएको छ । यस्तै माओवादी केन्द्रले ४ हजार ५ सय ९४, सङ्घीय समाजवादी फोरमले २ हजार ५ सय २९ र राप्रपाले ६ सय १५ मत ल्याएको छ ।

यस आधारमा हेर्दा इलाम क्षेत्र नं. १ मा एमाले र माओवादी केन्द्रले ३६ हजार ४ सय ४० मत ल्याएको छ । जुन नेपाली काङ्ग्रेसले पाएको मत भन्दा १२ हजार १ सय ६४ मत बढी हो । इलाम क्षेत्र नं. १ मा प्रतिनिधि सभा र प्रदेश सभा निर्वाचनका लागि १ लाख १ हजार ६४ मतदाता रहेका छन् ।

क्षेत्र नं. २
इलाम क्षेत्र नं. २ मा आगामी प्रतिनिधि सभा निर्वाचनमा वाम गठबन्धनबाट एमालेका नेता सुवास नेम्वाङ, नेपाली काङ्ग्रेसका केशव थापा र सङ्घीय समाजवादी फोरमका कृष्ण पौडेलबीच प्रतिस्पर्धा हुँदैछ ।

इलाम नगरपालिका वडा नं. १, २, ३, ४, ५, ६, ७, ८, ९, ११ र १२, देउमाई नगरपालिका, फाकफोकथुम गाउँपालिका, माङसेबुङ गाउँपालिका, चुलाचुली गाउँपालिका र माई नगरपालिकाका वडा नं. ६, ७ र ८ पर्छन् ।

क्षेत्र नं. २ मा स्थानीय तहमा प्रमुख तथा वडाध्यक्ष पदमा राजनीतिक दलले पाएको मतका आधारमा नेपाली काङ्ग्रेसले २८ हजार २६ मत पाएको छ । नेकपा एमालेले २९ हजार १ सय ८१, माओवादी केन्द्रले ५ हजार ५७ मत पाएको छ भने सङ्घीय समाजवादी फोरमले ३ हजार ५ सय ६४ मत पाएको छ भने राप्रपाले १ सय ८५ मत पाएको छ । यहाँ वाम गठबन्धनको कुल मत मिसाँउदा ३४ हजार २ सय ३८ मत छ । जुन नेपाली काङ्ग्रेसले पाएको मतभन्दा ६ हजार २ सय १२ बढी हो । इलाम क्षेत्र नं. २ मा आगामी निर्वाचनका लागि १ लाख २ हजार ९ सय ८६ मतदाता छन् ।

२) तेह्रथुम
आगामी प्रतिनिधि सभा निर्वाचनमा वाम गठबन्धनबाट एमालेका भवानी खापुङ, काङ्ग्रेसकी सीता गुरुङ र समाजवादी फोरमका तुलसीप्रसाद अधिकारीबीच प्रतिस्पर्धा हुँदैछ ।

१ निर्वाचन क्षेत्र रहेको तेह्रथुममा ६६ हजार ७ सय ४१ मतदाता रहेका छन् । स्थानीय तहको निर्वाचनमा राजनीतिक दलले पाएको मतका आधारमा तेह्रथुममा नेपाली काङ्ग्रेसले १८ हजार ४ सय ३१, नेकपा एमालेले १९ हजार १ सय ११, नेकपा माओवादी केन्द्रले ५ हजार ८१, राष्ट्रिय प्रजातन्त्र पार्टीले ७९, नयाँ शक्तिले २ सय ५४ मत पाएको छ । यस आधारमा तेह्रथुममा वाम गठबन्धन एमाले र माओवादी केन्द्रको २४ हजार १ सय ९२ मत छ भने नेपाली काङ्ग्रेस, राप्रपा र नयाँ शक्ति लोकतान्त्रिक गठबन्धनको १८ हजार ७ सय ६४ मत छ । यस आधारमा तेह्रथुममा वाम गठबन्धन ५ हजार ४ सय २८ मतले अगाडि देखिन्छ ।

३) धनकुटा
प्रतिनिधि सभा निर्वाचनका लागि १ निर्वाचन क्षेत्र रहेको धनुकुटामा वाम गठबन्धनबाट एमालेका राजेन्द्र राई र राप्रपाका सुनिल थापाबीच प्रतिष्पर्धा हुँदैछ ।

यहाँ १ लाख ५ हजार १ सय ९९ मतदाता छन् । स्थानीय तहको निर्वाचनमा धनकुटाका स्थानीय तहका प्रमुख पदमा राजनीतिक दलले पाएको मत अनुसार नेपाली काङ्ग्रेसले १८ हजार १ सय ३२, नेकपा एमालेले २९ हजार ९ सय ३, माओवादी केन्द्रले १० हजार ८३, राप्रपाले ३ हजार ८ सय ३०, मधेसी अधिकार फोरम लोकतान्त्रिकले ७३, नयाँ शक्ति नेपालले ५४ मत पाएको थियो । यसअनुसार धनकुटामा वाम गठबन्धनको ३९ हजार ९ सय ८६ मत छ । यस्तै नेपाली काङ्ग्रेसको नेतृत्वमा रहेको लोकतान्त्रिक गठबन्धनको २२ हजार ८९ मत रहेको छ । अर्थात यहाँ वाम गठबन्धनको १७ हजार ८ सय ९७ हाराहारी बढी मत देखिन्छ ।

४) उदयपुर
आगामी प्रतिनिधि सभा निर्वाचनका लागि उदयपुरमा दुई निर्वाचन क्षेत्र र प्रदेश सभा निर्वाचनका लागि ४ निर्वाचन क्षेत्र रहेका छन् । उदयपुरमा कूल १ लाख ९३ हजार ९ सय १३ मतदाता रहेका छन् । उदयपुरको समग्र दुई क्षेत्रमा वाम गठबन्धनको ६८ हजार ९ सय ९७ मत छ भने नेपाली काङ्ग्रेसको ३७ हजार ३ सय ५६ मत छ । उदयपुरमा गठबन्धन दल नेपाली काङ्ग्रेस भन्दा ३१ हजार ६ सय ४१ मतले अगाडि छ ।

क्षेत्र नं. १
उदयपुर क्षेत्र नं. १ मा एमालेकी मञ्जु चौधरी र नेपाली काङ्ग्रेसक डा. नारायण खड्काबीच मुख्य प्रतिष्पर्धा हुँदैछ ।
यो क्षेत्रमा बेलका नगरपालिका, चौदण्डीगढी नगरपालिका र त्रियुगा नगरपालिका रहेका छन् । गत स्थानीय तहको निर्वाचनमा यस क्षेत्रबाट नेपाली काङ्ग्रेसले २३ हजार ४ सय ३१ मत ल्याएको थियो । यस्तै एमालेले २३ हजार ५ सय १६ मत, माओवादी केन्द्रले १६ हजार १ सय ६ मत, नयाँ शक्तिले १६ सय ८३, राप्रपाले १ हजार ११ मत ल्याएको थियो । यस आधारमा यहाँ वाम गठबन्धनको पक्षमा ३९ हजार ६ सय २२ मत रहेको छ । यस्तै नेपाली काङ्ग्रेसको नेतृत्वमा रहेको लोकतान्त्रिक गठबन्धनको २६ हजार १ सय २५ मत रहेको छ । अर्थात उदयपुर क्षेत्र नं. १ मा वाम गठबन्धन भन्दा १३ हजार ४ सय ९७ हाराहारी मतले अगाडि रहेको छ । आगामी निर्वाचनका लागि उदयपुर क्षेत्र नं. १ मा १ लाख १४ हजार ५ सय ८६ मतदाता रहेका छन् ।

क्षेत्र नं. २
उदयपुर क्षेत्र नं. २ मा प्रतिनिधि सभा निर्वाचनका लागि माओवादी केन्द्रका सुरेशकुमार राई, काङ्ग्रेसका नारायण कार्की र फोरमका विष्णु राई दनुवारबीच प्रतिस्पर्धा हुँदैछ ।

यहाँ ७९ हजार ३ सय २७ मतदाता रहेका छन् । यो क्षेत्रअन्तर्गत रौतामाई गाउँपालिका, उदयपुरगढी गाउँपालिका, कटारी नगरपालिका, ताप्ली गाउँपालिका र सुनकोशी गाउँपालिका गरी ५ स्थानीय तह रहेका छन् ।

स्थानीय तहको निर्वाचनमा यो क्षेत्रबाट नेपाली काङ्ग्रेसले १३ हजार ९ सय २५ मत पाएको थियो भने एमालेले १६ हजार २ सय ६६, माओवादीले १२ हजार ५ सय ५९, नयाँ शक्तिले ४ सय ९६ र राप्रपाले १ सय २५ मत ल्याएको थियो । यस आधारमा यहाँ वाम गठबन्धनको पक्षमा २८ हजार ८ सय २५ हाराहारी मत छ भने लोकतान्त्रिक गठबन्धनको पक्षमा १४ हजार ५ सय ४६ मत रहेको छ । यहाँ वाम गठबन्धन लोकतान्त्रिक गठबन्धन भन्दा १४ हजार २ सय ७९ मतले अगाडि रहेको छ ।

५) झापा
आगामी प्रतिनिधि सभा निर्वाचन र प्रदेशसभा निर्वाचनका लागि झापामा ५ निर्वाचन क्षेत्र रहेका छन् । झापामा कुल ५ लाख ८५ हजार २ सय २८ मतदाता रहेका छन् । झापाका ५ निर्वाचन क्षेत्रमा स्थानीय तहको निर्वाचनमा प्रमुख तथा वडा अध्यक्षहरूले पाएको मतका आधारमा हामीले ती क्षेत्रमा दलहरूको अवस्थाको आँकलन गरेका छौँ । हामीले यहाँ प्रयोग गरेको मत सङ्ख्या स्थानीय तहमा पाएको मतको मोटामोटी मतसङ्ख्या हो ।

झापा क्षेत्र नं. १
झापा क्षेत्र नं. १ मा माओवादीका राम कार्की, काङ्ग्रेसका विश्वप्रकाश शर्मा र फोरमका भक्त सेवाहाङबीच प्रतिस्पर्धा हुँदैछ ।

यो क्षेत्रमा मेचीनगर नगरपालिका, भद्रपुर नगरपालिकाका वडा नं. ९ र १०, बुद्धशान्ति गाउँपालिकाका वडा नं. ४, ५, ६ र ७ पर्छन् । क्षेत्र नं. १ मा १ लाख ९ हजार ६ सय ७६ मतदाता छन् ।

यो क्षेत्रमा गत स्थानीय तहको निर्वाचनमा प्रमुख तथा वडा अध्यक्षहरूले मतका आधारमा नेपाली काङ्ग्रेसको २५ हजार ५ सय १ मत देखिन्छ भने एमालेको २५ हजार ६३ मत छ । यस्तै माओवादी केन्द्रले ९ हजार ८ सय ८८ मत र राप्रपाको १ हजार ३ सय ३३ र सङ्घीय समाजवादी फोरमले ४ सय ७० मत छ । यस आधारमा यहाँ एमाले र माओवादी वाम गठबन्धनको ३४ हजार ९ सय ५१ मत हुन आउँछ । जुन मत नेपाली काङ्ग्रेसले पाएको मतभन्दा ९ हजार ४ सय ५० बढी हो ।

झापा क्षेत्र नं. २
झापा क्षेत्र नं. २ मा एमालेकी पवित्रा खरेल, काङ्ग्रेसका उद्धव थापा र फोरमका मणी राई बीच प्रतिस्पर्धा हुँदैछ ।

क्षेत्र नं २ मा अर्जुनधारा नगरपालिका, विर्तामोड नगरपालिकाका वडा नं. १, २, ३, ४, ५, ६, ७, ८, र ९ पर्छन् । यस्तै बुद्धशान्ति गाउँपालिका वडा नं. १, २, र ३ पर्छन् भने कन्काई नगरपालिकाका वडा नं. ८ र ९ पर्छन् । क्षेत्र नं. २ मा १ लाख १४ हजार ३ मतदाता रहेका छन् ।

स्थानीय तहमा यो क्षेत्रमा नेपाली काङ्ग्रेसको २२ हजार ५ सय ८५ मत देखिन्छ भने एमालेको २८ हजार ७ सय २४, माओवादी केन्द्रको ७ हजार ५ सय ३, राप्रपाको ४ हजार ९ सय ४० मत देखिन्छ । यस्तै फोरम लोकतान्त्रिकको ५० र सङ्घीय समाजवादी फोरमको ४ सय ३१ मत छ ।

यहाँ वाम गठबन्धनको मत एकै ठाउँमा मिसाउँदा ३६ हजार २ सय २७ हुन्छ, जुन नेपाली काङ्ग्रेसको मतभन्दा १३ हजार ६ सय ४१ मत बढी हो । यहाँ राप्रपाको झन्डै ५ हजार मत रहेको छ । यदि यो मत पनि वाम गठबन्धनतिर जाने हो भने प्रत्यक्षतर्फको निर्वाचनमा नेपाली काङ्ग्रेस भारी मतले पछाडि पर्ने देखिन्छ ।

झापा क्षेत्र नं. ३
झापा क्षेत्र नं. ३ मा राप्रपाका राजेन्द्र लिङ्देन र नेपाली काङ्ग्रेसका कृष्णप्रसाद सिटौलाबीच प्रर्तिष्पर्धा हुँदैछ ।

यो क्षेत्रमा बाह्रदशी गाउँपालिका, हल्दीबारी गाउँपालिका, कचनकवल गाउँपालिका, भद्रपुर नगरपालिकाका वडा नं. १, २, ३, ४, ५, ६, ७ र ८ वडा र विर्तामोड नगरपालिकाको वडा नं. ८ पर्छ । यो क्षेत्रमा आगामी निर्वाचनका लागि १ लाख १४ हजार ५ सय ८६ मतदाता रहेका छन् ।

गत स्थानीय तहको निर्वाचनमा झापा ३ मा नेपाली काङ्ग्रेसले २० हजार ५ सय ४५, नेकपा एमालेले १९ हजार ८ सय ८०, माओवादी केन्द्रले ९ हजार ५ सय ८८, राप्रपाले १४ हजार १ सय ५, फोरम लोकतान्त्रिकले २ सय ५ र सङ्घीय समाजवादी फोरमले ७ सय ८६ मत पाएको थियो ।

यस आधारमा यहाँ वाम गठबन्धनसहित राप्रपाको मत मिसाउँदा ४३ हजार ५ सय ७३ हुन्छ । जुन नेपाली काङ्ग्रेसले पाएको मतभन्दा २३ हजार २८ मत बढी हो ।

झापा क्षेत्र नं. ४
झापा क्षेत्र नं. ४ मा एमालेका एलपी साँवा, काङ्ग्रेसका देउकुमार थेवे बीच मुख्य प्रतिस्पर्धा हँुदैछ ।

यो क्षेत्रमा झापा गाउँपालिका, गौरादह नगरपालिका वडा नं. ९, गौरीगञ्ज नगरपालिका वडा नं. १ र २, कन्काई नगरपालिका वडा नं. १, २, ३, ४, ५, ६, ७ र शिवशताक्षी नगरपालिका पर्छन् । यो क्षेत्रमा आगामी निर्वाचनका लागि १ लाख ९ हजार ४ सय १ मतदाता रहेका छन् ।

गत स्थानीय तहको निर्वाचनमा क्षेत्र नं. ४ मा मोटामोटी रूपमा नेपाली काङ्ग्रेसको २२ हजार ९ सय २९, एमालेको २६ हजार ४ सय १४, माओवादी केन्द्रको ९ हजार ६ सय ९९, राप्रपाको १९ सय ४२, फोरम लोकतान्त्रिकको ६ सय ३९ र सङ्घीय समाजवादी फोरमको १ सय २९ मत रहेको छ ।

यस आधारमा यहाँ वाम गठबन्धनसहित राप्रपाको मत जोड्दा ३८ हजार ५५ हुन्छ । नेपाली काङ्ग्रेस र फोरम लोकतान्त्रिकको मत जोड्दा २३ हजार ५ सय ६८ हुन्छ । अर्थात यहाँ वाम गठबन्धनको पक्षमा नेपाली काङ्ग्रेसको भन्दा १४ हजार ४ सय ८७ मत बढी देखिन्छ ।

झापा क्षेत्र नं. ५
झापा क्षेत्र नं. ५ मा एमाले अध्यक्ष केपी शर्मा ओली, काङ्ग्रेसका खगेन्द्र अधिकारीबीच मुख्य प्रतिस्पर्धा हुँदैछ ।

यो क्षेत्रमा गौरीगञ्ज गाउँपालिकाका वडा नं. ३, ४, ५ र ६, गौरादह नगरपालिकाका वडा नं. १, २, ३, ४, ५, ६, ७ र ८, दमक नगरपालिका र कमल नगरपालिका पर्छन् । यो निर्वाचन क्षेत्रमा १ लाख ३७ हजार ५ सय ६२ मतदाता छन् ।

गत स्थानीय तहको निर्वाचनमा यो क्षेत्रमा नेकपा एमाले पहिलो दल बनेको थियो । मोटामोटी रूपमा नेपाली काङ्ग्रेसको २३ हजार २ सय ५०, नेकपा एमालेको २९ हजार ४ सय ६०, माओवादी केन्द्रको १३ हजार ५ सय ८३, राप्रपाको १० हजार २ सय २२, फोरम लोकतान्त्रिकको ११ सय ९४ र सङ्घीय समाजवादी फोरम लोकतान्त्रिकको १ हजार ३४ मत रहेको छ ।

यस आधारमा यहाँ वाम गठबन्धनसहित राप्रपाको मत जोड्दा कूल ५३ हजार २ सय ६८ हुन्छ । यस्तै नेपाली काङ्ग्रेस र फोरम लोकतान्त्रिकको मत जोड्दा २४ हजार ४ सय ४४ हुन्छ । अर्थात यहाँ वाम गठबन्धनको नेपाली काङ्ग्रेसको भन्दा २८ हजार ८ सय २४ मत धेरै रहेको छ ।

६) मोरङ
मोरङमा प्रतिनिधि सभा निर्वाचनका लागि ६ क्षेत्र रहेका छन् भने जिल्लामा कूल ६ लाख ४४ हजार ७ सय ८५ मतदाता रहेका छन् । नेपाली काङ्ग्रेसको आधार क्षेत्र रहेको मोरङमा एमाले र माओवादी केन्द्रले तालमेल गरेर चुनावी मैदानमा होमिएपछि नेपाली काङ्ग्रेसको साइज घट्ने अनुमान गरिएको छ ।

मोरङ क्षेत्र नं. १
मोरङ क्षेत्र नं. १ मा आगामी प्रतिनिधि सभा निर्वाचनका लागि वाम गठबन्धनबाट एमालेका घनश्याम खतिवडा, नेपाली काङ्ग्रेसका डिकबहादुर लिम्बु र सङ्घीय समाजवादी फोरमका देवेन्द्र श्रेष्ठ चुनावी प्रतिस्पर्धामा छन् । क्षेत्र नंंं. १ मा १ लाख ७ हजार २ सय ३५ मतदाता रहेका छन् ।

गत स्थानीय तहको निर्वाचनका विभिन्न राजनीतिक दलले स्थानीय तह प्रमुख र वडा अध्यक्षले पाएको मतका आधारमा मोटोमोटी रूपमा दलहरूको अवस्था बुझ्ने प्रयास गरेका छौँ । क्षेत्र नं. १ मा नेपाली काङ्ग्रेसले २७ हजार ६ सय ९७ मत पाएको थियो । यस्तै नेकपा एमालेले २५ हजार ६ सय ४४, माओवादी केन्द्रले ७ हजार ४ सय १९, नयाँ शक्तिले ३७, राप्रपाले ४ सय ९५, फोरम लोकतान्त्रिकले ३८ र सङ्घीय समाजवादी फोरमले ६३ मत पाएको थियो ।

यस आधारमा यहाँ वाम गठबन्धनको पक्षमा ३३ हजार ६३ मत छ । यहाँ नेपाली काङ्ग्रेसले प्राप्त गरेको मतभन्दा ५ हजार ३ सय ६६ हाराहारी मतले वाम गठबन्धन अगाडि रहेको छ ।

मोरङ क्षेत्र नं. २
आगामी निर्वाचनका लागि मोरङ क्षेत्र नं. २ मा १ लाख ११ हजार ३ सय २१ मतदाता रहेका छन् । यो निर्वाचन क्षेत्रमा वाम गठबन्धनबाट एमालेका ऋषिकेश पोखरेल, नेपाली काङ्ग्रेसका मिनेन्द्रप्रसाद रिजाल र सङ्घीय समाजवादी फोरमका युवराज कार्कीबीच प्रतिस्पर्धा हुँदैछ ।

गत स्थानीय तहको निर्वाचनमा मोरङ २ मा मोटामोटी रूपमा नेपाली काङ्ग्रेसले २२ हजार ९ सय ८०, नेकपा एमालेले १९ हजार १७, माओवादी केन्द्रले १२ हजार २ सय ८२, नयाँ शक्तिले ४ सय ४९, राप्रपाले २ हजार ७ सय ९, फोरम लोकतान्त्रिकले ७ सय ९१ र सङ्घीय समाजवादी फोरमले ३ हजार ६ सय ५३ मत ल्याएको थियो ।

यस आधारमा यहाँ वाम गठबन्धनको पक्षमा ३१ हजार २ सय ९९ मत रहेको छ । मेची अञ्चलमा राप्रपाले पनि वाम गठबन्धनलाई सघाउने बताइरहेका बेला वाम गठबन्धनमा राप्रपाको मत जोड्दा ३४ हजार ८ हुन्छ । नेपाली काङ्ग्रेसको मतमा फोरम लोकतान्त्रिकले पाएको मत मिसाउँदा २३ हजार ७ सय ७१ हुन्छ, जुन वाम गठबन्धनको मतभन्दा १० हजार २ सय ३७ कम हो । यस आधारमा हेर्दा मोरङ क्षेत्र नं. २ मा वाम गठबन्धनलाई पराजित गर्न नेपाली काङ्ग्रेसलाई कठिन पर्ने देखिन्छ ।

मोरङ क्षेत्र नं. ३
मोरङ क्षेत्र नं.३ मा आगामी निर्वाचनका लागि १ लाख २७ हजार ४ सय ९६ मतदाता रहेका छन् । वाम गठबन्धनबाट एमालेका भानुभक्त ढकाल, नेपाली काङ्ग्रेसका सुनिलकुमार शर्मा र सङ्घीय समाजवादी फोरमका लोक सागर साँवा बीच चुनावी प्रतिस्पर्धा हुँदैछ ।

गत स्थानीय तहको निर्वाचनका मोरङ क्षेत्र नं. ३ बाट मोटामोटी रूपमा नेपाली काङ्ग्रेसले २२ हजार ६ मत पाएको थियो भने नेकपा एमालेले २९ हजार १ सय ७३, माओवादी केन्द्रले १३ हजार ४ सय ९८, नयाँ शक्तिले ७ सय १०, राप्रपाले ५ सय ३५, सङ्घीय समाजवादी फोरमले ३५ र फोरम लोकतान्त्रिकले ११ सय २ मत पाएको थियो ।

यस आधारमा यहाँ वाम गठबन्धनको पक्षमा ४२ हजार ६ सय ७१ मत रहेको छ । जुन नेपाली काङ्ग्रेसले पाएको मतभन्दा २० हजार ६ सय ६५ मत धेरै देखिन्छ । स्थानीय तहमा राजनीतिक दलले पाएको मत प्रतिनिधि सभा निर्वाचनका बेला केही फरक परे पनि यहाँ बाम शक्ति नै बलियो हुने देखिएको छ ।

मोरङ क्षेत्र नं. ४
आगामी प्रतिनिधि सभा र प्रदेश सभा निर्वाचनका लागि मोरङ क्षेत्र नं.४ मा ९९ हजार १ सय २४ मतदाता रहेका छन् । यो क्षेत्रमा वाम गठबन्धनका तर्फबाट माओवादी केन्द्रका अमनलाल मोदी, नेपाली काङ्ग्रेसका महेश आर्चाय र सङ्घीय समाजवादी फोरमका तर्फबाट लोक सागर साँवा चुनावी प्रतिस्पर्धामा रहेका छन् ।
गत स्थानीय तहको निर्वाचनमा प्रमुख तथा वडाध्यक्षहरूले पाएको मतका आधारमा क्षेत्र नं. ४ मा मोटामोटी रूपमा नेपाली काङ्ग्रेसले १७ हजार १, नेकपा एमालेले १७ हजार ९ सय ३३, माओवादी केन्द्रले ६ हजार १ सय ३१, राप्रपाले १६ सय ३, फोरम लोकतान्त्रिकले ८ हजार २ सय १ र सङ्घीय समाजवादी फोरमले ४ हजार २ सय २८ मत पाएको थियो । यस आधारमा यहाँ वाम गठबन्धनको पक्षमा २४ हजार ६४ मत देखिन्छ । यस्तै हालसालै नेपाली काङ्ग्रेसमा बिलय भएको फोरम लोकतान्त्रिकले पाएको मत नेपाली काङ्ग्रेसले पाएको मतमा मिसाउँदा २५ हजार २ सय २ हुन्छ । अर्थात् यहाँ नेपाली काङ्ग्रेस ११ सय ३८ मतले अगाडि देखिन्छ । यहाँ राप्रपाले १२ सय ३ मत ल्याएको थियो । लोकतान्त्रिक गठबन्धनमा समेत रहेको राप्रपाको मत नेपाली काङ्ग्रेसलाई जाने हो भने नेपाली काङ्ग्रेस केही बलियो हुनेछ ।

मोरङ क्षेत्र नं. ५
आगामी निर्वाचनका लागि मोरङ क्षेत्र नं. ५ मा ८९ हजार २ सय ८७ मतदाता रहेका छन् । वाम गठबन्धनबाट माओवादी केन्द्रका शिवकुमार मण्डल, नेपाली काङ्ग्रेसका तर्फबाट अमृतकुमार अर्याल र सङ्घीय समाजवादी फोरमबाट राजकुमार यादव प्रतिस्पर्धामा छन् ।

गत स्थानीय तहको निर्वाचनमा यो क्षेत्रबाट नेपाली काङ्ग्रेसले १३ हजार ७ सय ३०, नेकपा एमालेले १० हजार ४ सय ९३, माओवादी केन्द्रले १० हजार २ सय २३, नयाँ शक्तिले ६७, राप्रपाले १ हजार ३ सय १७, फोरम लोकतान्त्रिकले २ हजार ४ सय ६५ र सङ्घीय समाजवादी फोरमले १४ हजार १ सय ८ मत पाएको थियो ।
यस आधारमा हेर्दा यो क्षेत्रमा वाम गठबन्धनको पक्षमा २० हजार ७ सय १६ मत रहेको छ भने नेपाली काङ्ग्रेस र फोरम लोकतान्त्रिकको मत जोड्दा १६ हजार १ सय ९५ मत पाएको थियो, जुन वाम गठबन्धनको भन्दा ४ हजार ५ सय २१ मत कम हो ।

मोरङ क्षेत्र नं. ६
यो निर्वाचन क्षेत्रमा आगामी निर्वाचनका लागि १ लाख १० हजार ३ सय २२ मतदाता रहेका छन् । यहाँ वाम गठबन्धनबाट एमालेका लालबाबु पण्डित र नेपाली काङ्ग्रेसबाट डा. शेखर कोइरालाबीच प्रतिस्पर्धा हुँदैछ । पण्डित पूर्व सामान्य प्रशासन मन्त्री हुन् भने कोइराला नेपाली काङ्ग्रेसका केन्द्रीय सदस्य हुन् ।

गत स्थानीय तहको निर्वाचनमा मोरङ क्षेत्र नं. ६ मा नेपाली काङ्ग्रेसले १९ हजार ८ सय २, नेकपा एमालेले १८ हजार १ सय ६८, माओवादी केन्द्रले ८ हजार ६८, राप्रपाले २ हजार ५ सय ९९, फोरम लोकतान्त्रिकले ८ हजार १ सय ९६ र सङ्घीय समाजवादी फोरमले ४ हजार ६ सय ७७ मत पाएका थिए ।

यस आधारमा यहाँ वाम गठबन्धनको पक्षमा २६ हजार २ सय ३६ मत रहेको छ भने नेपाली काङ्ग्रेस फोरम लोकतान्त्रिकले पाएको मत हिसाब गर्दा २७ हजार ९ सय ९८ मत रहेको छ । यस आधारमा यहाँ वाम गठबन्धनभन्दा नेपाली काङ्ग्रेस १७ सय ६२ मतले अगाडि रहेको छ । लोकतान्त्रिक गठबन्धनमा रहेको राप्रपाको २५ सय ९९ मत छ ।
स्थानीय तहमा पाएको मतका आधारमा मोरङ क्षेत्र नं. ६ मा नेपाली काङ्ग्रेस र वाम गठबन्धनबीच कडा प्रतिस्पर्धा हुने आँकलन गर्न सकिन्छ ।

७) सुनसरी
सुनसरीमा आगामी प्रतिनिधि सभा निर्वाचनका लागि ४ र प्रदेश सभा निर्वाचनका लागि ८ निर्वाचन क्षेत्र रहेका छन् भने जिल्लामा कूल ४ लाख ७४ हजार ३ सय मतदाता रहेका छन् ।

सुनसरी क्षेत्र नं. १
सुनसरी क्षेत्र नं. १ मा आगामी प्रतिनिधि सभा र प्रदेश सभा निर्वाचनका लागि १ लाख २२ हजार ६ सय ८ मतदाता रहेका छन् । वाम गठबन्धनबाट एमालेका जय राई र सङ्घीय समाजवादी फोरमबाट अशोक कुमार राईबीच प्रतिस्पर्धा हुँदैछ । यहाँ नेपाली काङ्ग्रेस र सङ्घीय समाजवादी फोरम नेपालले चुनावी तालमेल गरेका कारण नेपाली काङ्ग्रेसले उम्मेदवार उठाएको छैन ।

गत स्थानीय तहको निर्वाचनमा सुनसरी १ मा काङ्ग्रेसले २३ हजार २४, एमालेले ३० हजार १ सय ३८, माओवादी केन्द्रले १२ हजार ७ सय ४०, नयाँ शक्तिले ५ हजार ५ र राप्रपाले ५ सय ८७ मत पाएको थियो ।

यहाँ वाम गठबन्धनको पक्षमा ४२ हजार ८ सय ७८ मत देखिन्छ जुन नेपाली काङ्ग्रेसले पाएको मतभन्दा १९ हजार ८ सय ५४ बढी मत हो । यहाँ स्थानीय तहको निर्वाचनमा सङ्घीय समाजवादी फोरम र नयाँ शक्तिले चुनावी तालमेल गरी ५ हजार ५ मत पाएका थिए । यो मत नेपाली काङ्ग्रेसले पाएको मतमा मिलाउने हो भने २८ हजार २९ मत हुन्छ । यो मत जोड्दा पनि लोकतान्त्रिक गठबन्धन वाम गठबन्धनभन्दा १४ हजार ८ सय ४९ पछाडि परेको छ । स्थानीय तहको चुनावमा आधारमा सङ्घीय समाजवादी फोरमका नेता अशोककुमार राईले सहजै जित निकाल्न सकिने अवस्था देखिँदैन ।

सुनसरी क्षेत्र नं. २ ः
आगामी निर्वाचनका लागि सुनसरी क्षेत्र नं.२ मा १ लाख ३० हजार ३ सय ७० मतदाता रहेका छन् । यो निर्वाचन क्षेत्रमा वाम गठबन्धनबाट माओवादी केन्द्रका डम्बर सुवेदी, नेपाली काङ्ग्रेसका सीताराम मेहता र सङ्घीय समाजवादी फोरमका तेज नारायण चौधरी चुनावी मैदानमा छन् ।
गत स्थानीय तहको निर्वाचनमा सुनसरी २ बाट मोटामोटी रूपमा नेपाली काङ्ग्रेसले २७ हजार ८ सय ५९, नेकपा एमालेले २८ हजार ९ सय ४०, माओवादी केन्द्रले ४ हजार ६ सय ३९, नयाँ शक्तिले ४ सय ४, राप्रपाले १२ सय ७६, फोरम लोकतान्त्रिकले ५ हजार ७ सय २८ र सङ्घीय समाजवादी फोरमले ४ हजार ६ सय २२ मत पाएको थियो ।

यस आधारमा यहाँ वाम गठबन्धनको पक्षमा ३३ हजार ६ सय ७९ मत छ । यस्तै नेपाली काङ्ग्रेस र फोरम लोकतान्त्रिकको मत मिसाउँदा ३३ हजार ५ सय ८७ मत हुन्छ । यहाँ राप्रपाले पाएको १२ सय ७६ र नयाँ शक्तिले पाएको मत नेपाली काङ्ग्रेसमा मिसाउने हो भने वाम गठबन्धन भन्दा नेपाली काङ्ग्रेस १५ सय ८८ मतले अगाडि देखिन्छ । यसआधारमा भन्नुपर्दा यहाँ वाम गठबन्धन र नेपाली काङ्ग्रेसबीच कडा टक्कर पर्नेछ ।

सुनसरी क्षेत्र नं. ३ ः
अगाामी निर्वाचनका लागि सुनसरी क्षेत्र नं. ३ मा १ लाख ९ हजार ८ सय ४१ मतदाता छन् । यो क्षेत्रमा वाम गठबन्धनबाट एमालेकी भगवती चौधरी र काङ्ग्रेसका नेता एवं मन्त्री विजयकुमार गच्छदार बीच चुनावी प्रतिस्पर्धा हुँदैछ ।

गत स्थानीय तहको निर्वाचनमा यो क्षेत्रमा काङ्ग्रेसले २१ हजार ५ सय ७७, एमालेले २० हजार २७, माओवादीले ५ हजार ९ सय ९३, राप्रपाले १८ सय ८९, फोरम लोकतान्त्रिकले १७ हजार ६ सय ७३ र सङ्घीय समाजवादी फोरमले ३ हजार ४ सय २७ मत पाएको थियो ।

यस आधारमा हेर्दा यहाँ वाम गठबन्धनको पक्षमा २६ हजार २० मत छ भने नेपाली काङ्ग्रेसको पक्षमा ३९ हजार २ सय ५० मत देखिन्छ । अर्थात यहाँ नेपाली काङ्ग्रेसको पक्षमा १३ हजार २ सय ३० मत रहेको छ ।

सुनसरी ४
सुनसरी क्षेत्र नं. ४ मा १ लाख ११ हजार ४ सय ८१ मतदाता छन् । यहाँ आगामी प्रतिनिधि सभा निर्वाचनका लागि वाम गठबन्धनबाट एमालेका रमेश श्रेष्ठ, नेपाली काङ्ग्रेसका ज्ञानेन्द्रबहादुर कार्की र फोरम लोकतान्त्रिकका महेन्द्र यादव चुनावी प्रतिस्पर्धामा छन् ।

गत स्थानीय तहको निर्वाचनमा यो क्षेत्रमा मोटामोटी रूपमा काङ्ग्रेसले २१ हजार २ सय ३३, एमालेले १८ हजार ३ सय २२, माओवादीले ४ हजार २ सय ६, राप्रपाले ११ सय ७०, फोरम लोकतान्त्रिकले ३ हजार ६ सय ६७ र सङ्घीय समाजवादी फोरम नेपालले ८ हजार ९ सय १७ मत पाएको थियो ।

यसअनुसार यहाँ वाम गठबन्धनको पक्षमा २२ हजार ५ सय २८ र लोकतान्त्रिक गठबन्धनको पक्षमा २४ हजार ९ सय मत रहेको छ ।