तेस्रो चरणको आन्दोलनका लागि जनमत पार्टीको बैठक बस्दै
तेस्रो चरणको आन्दोलनका कार्यक्रम तय गर्नका लागि सिके राउत नेतृत्वको जनमत पार्टीको कार्यकारिणी समितिको बैठक आज बस्दैछ । जनकपुरमा आज बस्न लागेको सो बैठकमा दुई चरणमा सम्पन्न आन्दोलनको कार्यक्रमको समीक्षा, पालिका तहमा भएका अधिवेशनको रिपोर्टिङ र तेस्रो चरणका आन्दोलनको कार्यक्रम बारे समीक्षा हुने सो जनमत पार्टीका महासचिव चन्दन सिंहले बताए ।
संघीय खानेपानी तथा ढल व्यवस्थापन आयोजना कार्यालय जनकपुरका निमित्त प्रमुख राजेश कुशवाहमाथि जनमत पार्टीका कार्यकर्ताले कात्तिक ४ गते गरेको दुर्व्यवहारमा संलग्न कार्यकर्तालाई प्रहरीले पक्राउ गरेको थियो । त्यसको विरुद्धमा जनमत पार्टीले आन्दोलनका कार्यक्रम घोषणा गरेको थियो । दोस्रो चरणको आन्दोलन गरिरहँदा थुनामा रहेका उनका कार्यकर्तालाई प्रहरीले रिहा गरिसकेको छ । आफ्ना कार्यकर्ता रिहा भइसकेपछि अब कस्तो खालको आन्दोलनका कार्यक्रम गर्ने त्यस विषयमा आजको बैठकले तय गर्ने गर्ने बताइएको छ ।