एक्सक्लुसिभ स्टोरी
युनिकोड
मिति रूपान्तरण
लेटाङ घटनाका कारक ‘एमपी सर’ विरुद्ध पाँच वर्ष अघिदेखि नै उजुरी
गत आइतबार मोरङको लेटाङमा एक जना प्रहरीको ज्यान जाने गरी भएको घटनाको मुख्य कारक ‘एमपी सर’ अर्थात् मनोज प्रसाद पौडेलविरुद्ध ०७३ सालदेखि नै विद्यार्थीले उजुरी गरेको पाइएको छ ।
पौडेलका विरुद्ध विद्यार्थीहरूले पहिलो पटक ‘विगत समयको समस्या फेरि दोहोर्‍याइएको बारे’ भन्ने विषयमा २०७३ साल जेठ २३ गते शिक्षा विकास मावि लेटाङमा प्रधानाध्यापकलाई उजुरी दिएका थिए ।
त्यसबेलै उक्त निवेदन विद्यालय व्यवस्थापन समितिको बैठक, शिक्षक बैठकमा पेस गर्ने तोकआदेश प्रधानाध्यापकले दिएको देखिन्छ । ‘उपरोक्त सम्बन्धमा यसै विद्यालयमा पढाउँदै आइरहनु भएको शिक्षक मनोज पौडेलज्यूको विगतको समयमा भएको गल्ती फेरि दोहोर्‍याइएको जानकारी हजुरसामु पेस गर्दछु । उक्त समस्यालाई बुझी प्रधानाध्यापकले त्यही अनुसार आफ्नो विचार राखी दिई न्याय नपाएका विद्यार्थीहरूलाई न्याय दिलाइदिनु हुन विनम्रसाथ हार्दिक अनुरोध गर्दछु,’ विद्यार्थीहरूले त्यसबेला प्रधानाध्यापक डिल्लीराम ओझालाई दिएको पत्रमा उल्लेख छ ।
सोही पत्रको विषयमा विद्यालय व्यवस्थापन समितिका अध्यक्ष नरबहादुर श्रेष्ठ तथा प्रधानाध्यापकसहित शिक्षक र विद्यार्थीसमक्ष आरोपित शिक्षक पौडेलले आउने दिनमा गल्ती नगर्ने भनी कागजसमेत गरेका छन् । ‘उपर्युक्त विद्यार्थीसमेत राखी छलफल सोधनी गर्दा छात्राहरूबाट हामीलाई मनोज सरबाट यौन हिंसा भएकै हो भनी किटानी दिएको र उक्त कार्य मबाट गल्ती भएकोले अब उप्रान्त मबाट यस्तो महिला यौनजन्य हिंसाको गल्ती कहिल्यै दोहोर्याउने छैन, यदि मबाट कुनै किसिमको यस्ता गल्ती दोहोर्‍याएमा विद्यालयले गरेको कारबाहीप्रति मेरो मन्जुर छ भनी निम्न विवरणको व्यक्तिहरूको रोहबरमा मेरो मञ्जुरी साथ सही गरिदिएँ,’ पौडेलले गरेको कायलनामामा उल्लेख छ ।
यसअघि पनि उक्त घटना दोहोर्याएको भनी विद्यार्थीले ०७३ जेठमै उजुरी दिएको घटना विवरण स्कुलमा फाइल बनेर बसेको छ । निवेदन हुनु अगाडिदेखि नै शिक्षक पौडेलले छात्राहरूलाई यौन दुर्व्यवहार गर्ने गरेको निवेदनको भाषाले बताउँछ ।
निवेदन दिने र यौन दुर्व्यवहारको सिकार हुने छात्राहरूमा कक्षा ४ देखि कक्षा ७ सम्मका छन् । गत चैत ४ गते पनि शिक्षक पौडेलले कक्षा ७ मा अध्ययन गर्ने एक छात्राको घरमा होली खेल्ने निहुँले पुगेका थिए । ‘उपरोक्त सम्बन्धमा मिति २०७८/१२/३ गतेका दिन मलाई मेरो सरले मेरै घरमा धेरै पटक आएर म माथि नराम्रो दृष्टिले हेर्नुहुन्थ्यो । तर, ४ गते शुक्रबारको दिन मेरो घरमा कोही नभएको बेला पानी खाने निउँ पारेर किचनमा पसेर ममाथि हातपात गर्नुभयो । मलाई मात्र नभएर मेरो कक्षाको सम्पूर्ण साथीहरूलाई पनि नराम्रो दृष्टिले हेर्नुहुन्छ । त्यसैले हामीलाई न्याय चाहियो । हामी सहेर बस्ने छैनौँ,’ ती छात्राले प्रधानाध्यापक लक्ष्मीप्रसाद मिश्रलाई दिएको निवेदनमा उल्लेख छ ।
सोही विद्यालयमा १० कक्षामा अध्ययनरत विद्यार्थी सुस्मिता राईको भनाइमा मनोज पौडेलले छोरा मान्छेलाई र छोरी मान्छेलाई गर्ने व्यवहार फरक हुने गरेको छ । उनले आफू ८ कक्षामा अध्ययन गर्दा पनि मनोज सरले आफ्ना साथीहरूलाई त्यसखालको दुर्व्यवहार गर्ने गरेको सम्झिइन् ।
शिक्षा बाल विकास क्लबको उपाध्यक्ष समेत रहेकी सुस्मिताका अनुसार त्यस दिन पनि शिक्षकलाई जागिरबाट निकाल्ने र कानून अनुसार कारबाही हुनुपर्ने माग विद्यार्थीले गरेका थिए । ‘त्यसक्रममा विद्यार्थीबाहेक अन्य नचिनेका मान्छेहरू आएर झन् ठुलो घटना भयो,’ उनले भनिन् ।
मुख्य दोषी शिक्षक पौडेल नै रहेको विद्यालयका प्रधानाध्यापक मिश्रको भनाइ छ । ‘हामीले त विद्यार्थीले कम्प्लेन गरेपछिका फाइल नै बनाएर राखेका छौँ, विद्यालय नमुना बनाउने गरी काम भइरहेको छ, यसखालका घटना हुनुहुँदैन भनेर हामीले मनोज सरलाई खुब सम्झायौँ,’ उनले भने, ‘त्यस दिन त कारबाहीको दायरामा ल्याउने तयारीस्वरुप छलफल भएको थियो, एक्कासी नसोचेको परिणाम निस्कियो ।’
घटनामा संलग्न भनिएका शिक्षक पौडेल अहिले प्रहरी नियन्त्रणमा छन् । विद्यार्थीमाथि यौन दुर्व्यवहार गर्ने शिक्षक पौडेलमाथि कारबाहीको माग गर्दै लेटाङमा गत आइतबार भएको प्रदर्शन र त्यसलगत्तै प्रहरी र स्थानीयवासीबीच भएको झडपमा परी उदयपुरकी प्रहरी जवान उर्मिला श्रेष्ठको मृत्यु भएको थियो । घटनामा परी मोरङका प्रहरी प्रमुख एसपी जनार्दन जिसीसहित २५ प्रहरी र ७ जना स्थानीयवासी घाइते भएका छन् ।
प्रहरीले अहिलेसम्म घटनामा संलग्न भनेर एक दर्जन बढीलाई नियन्त्रणमा लिएर सोधपुछ गरिरहेको छ भने लेटाङमा आइतबार रातिदेखि लागेको निषेधाज्ञा आजदेखि केही खुकुलो पार्ने तयारी भइरहेको छ । लेटाङको अवस्था सामान्य बनाउन प्रहरी र स्थानीयवासी लागेका छन् ।
खबर पढेर तपाईलाई कस्तो महसुस भयो ?
प्रतिक्रिया
लेखकको बारेमा
