नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले माओवादी पार्टी छोडेर एमालेमा जानेहरू अवसरवादी र धोकेवाज भएको टिप्पणी गरेका छन् ।  बिहीबार चितवनको माडीमा आयोजित कार्यक्रमलाई सम्बोधन गर्दै अध्यक्ष प्रचण्डले माओवादी छोड्नेहरू आफुलाई क्रान्तिकारी भन्ने तर दक्षिणपन्थी पार्टी एमालेमा प्रवेश गरेर आफ्नो चरित्र प्रस्ट्याएको बताए । ‘माओवादी छोड्नेहरू कमसेकम मोहन वैद्य किरणजी वा नारायणमान बिजुक्छेको पार्टीमा गएका भए ठिकै भन्न सकिन्थ्यो तर एमाले गएका छन्’,प्रचण्डले भने, ‘उनीहरु अवसरवादी र धोकेवाज हुन् ।’ उनले काँग्रेस प्रवेश गर्न हिँडेको मान्छे आकाशवाणीपछि एमाले प्रवेश गरेको घट्ना समेत सुनाए । 

अध्यक्ष प्रचण्ड प्रदेशस्तरीय कार्यक्रम सकेलगत्तै बिहीबार आफ्नो निर्वाचन क्षेत्र चितवन पुगेका हुन् । विकासे कार्यक्रमको उद्घाटनदेखि पार्टी प्रवेश कार्यक्रममा सहभागी हुन चितवन पुगेका प्रचण्ड बिहीबारै झण्डै आधा दर्जन कार्यक्रममा सहभागी हुँदैछन् । माडीमा भएको कार्यक्रममा उनले एमाले, काँग्रेस, माओवादी क्रान्तिकारी र राप्रपालगायत विभिन्न पार्टी छोडेका नेता कार्यकर्ताहरूलाई पार्टी प्रवेश गराएका छन् ।