कविता : बुबाको सम्झना
शनिबार, २८ साउन २०७९, ०६ : ४५
केही घाउ आलो नै ठीक हुन्छ शायद
याद दिलाउँछ त्यो समयको
जसले फरक पर्दछ जिन्दगीमा
जसले महत्व राख्छ हर खुशीमा ।
म पनि प्रतिबिम्ब हुँ त्यही रुपको शायद
सबैलाई त्यही झझल्को दिलाउने
जिन्दगीको हरेक मोडहरुमा
सम्झना बनी साथ रहिरहने ।
त्यो माया, आशिर्वाद अनि गाली
सबै याद आउँछ मनभरि
कहिलेकाहीँ त भक्कानो फुट्छ
तर व्यक्त गर्नै नसक्ने गरी ।
बुवा हुनुको अर्थ बुझ्दैछु भर्खर
त्यो मायाको मर्म जान्दैछु हरपल
मेरा खुशीमा हुने अभाव त्यो साथको
आशीर्वादबाटै पूरा गर्नुछ शायद ।