एक्सक्लुसिभ स्टोरी
युनिकोड
मिति रूपान्तरण
कविता : तिमी अर्को बाटो भएर हिँड्नु
शनिबार, १८ भदौ २०७९, १४ : ५३
तिमी अर्को बाटो भएर हिँड्नु
यादको सिङ्गो पहाड बोकेर
प्रेमको भारी बिसाउन
निस्केको यात्रीका
पैतालाका डोबहरुमा
स्मृति छोडिन सक्छ,
तिमी अर्को बाटो भएर हिँड्नु ।
प्रेमको जग बलियो बनाउन
गाडिएका कसमका
गरुङ्गा ढुङ्गाहरु
निकाल्दा कम्पन हुन सक्छ,
तिमी अर्को बाटो भएर हिँड्नु ।
अझै केही यादहरु
सम्झना खोसेर तिमीलाई दिन
लालायित होलान्,
तिनीहरु विरुद्ध
हातपात हुन सक्छ,
तिमी अर्को बाटो भएर हिँड्नु ।
संगै बसेर देखेका
सपनाका समाधि तयार गर्न
हिँडेका बाटोको बिट मार्न
यादको सिङ्गो पहाड ढलाउँदा
पहिरो खस्न सक्छ,
बाटो त्यही सकिन सक्छ
तिमी अर्को बाटो भएर हिँड्नु ।
खबर पढेर तपाईलाई कस्तो महसुस भयो ?
प्रतिक्रिया
लेखकको बारेमा
