‘जाजरकोट र हुम्लामा फैलिएको भाइरलको प्रकोप नियन्त्रणमा’
काठमाडौं– जाजरकोट र हुम्लामा फैलिएको भाइरल ज्वरोको प्रकोप नियन्त्रणमा आएको सम्बन्धित जिल्ला जनस्वास्थ्य कार्यालयले दाबी गरेका छन् ।
जिल्ला जनस्वास्थ्य कार्यालय जाजरकोटका प्रमुख राम बहादुर नेपालीले भाइरलको प्रकोप नियन्त्रणमा आएको रातोपाटीलाई बताए । उनका अनुसार जिल्लाको जुनीचादी गाँउपालिकाको वडा नम्बर १, २ र ३ मा भाइरल फैलिएको थियो भने सो क्रममा ५ जनाको ज्यान गएको थियो ।
मृत्यु हुनेमा जुनचाँदी गाउँपालिकाका वडा नम्बर २ स्थित भैरबटोलकी ५२ वर्षीया धनसारा नाथ , वेसीपाटाकी ७२ वर्षीय का शत्रुप शाही ,६२ वर्षीया आईती तिरुवा, ५२ वर्षीय करसिंह टमाट र राम बहादुर शाहीको ८ दिनका शिशुको मृत्यू भएको प्रमुख नेपालीले बताए ।
यस्तै अन्य ६ सय जना गम्भीर बिरामीको उपचार जारी रहेको उनको भनाई छ ।
उनका अनुसार २० गतेदेखि भाइरल ज्वरो फैलिए पनि जिल्ला जनस्वास्थ्य कार्यालयलाई २१ गते मात्रै जानकारी प्राप्त भएको थियो ।
भाइरल फैलिएको स्थान पुग्नको लागि जिल्ला सदरमुकामबाट २ दिन लाग्ने हुँदा टोली पुग्न ढिला भएको कार्यालयले जनाएको छ ।
महामारी फैलिनु २ दिन पहिला मात्रै सबै स्वास्थ्य चौकी तथा हेल्पोष्टमा औषधि वितरण गरेको कारण महामारीले ठूलो रुप लिन नपाएको पनि नेपालीको दाबी छ ।
आज देखि योजनाबद्ध रुपमा टोलटोलामा स्वास्थ्यकर्मीहरु खटाएको पनि नेपालीले बताए । फिल्डमा डाक्टर पवन शाख्यको नेतृत्वमास्वास्थ्यकर्मीहरुको टोली खटिएको छ । जनस्वास्थ्य कार्यालयका अनुसार भाइरलबाट ६ सय भन्दा धेरै स्थानीय प्रभावित भएका थिए ।
यस्तै हुम्ला जनस्वास्थ्य कार्यालयका प्रमुख डा. रञ्जित कुमार यादवले पनि जिल्लामा फैलिएको फाइरलको माहामारी नियन्त्रणमा आएको बताए । उनका अनुसार मेडिकल असिसटेन्ड डाक्टर नविन रोकायाको नेतृत्वको टोलीले प्रभावित क्षेत्रमा उपचार जारी राखेको छ ।
एक सातायता सर्केघाट गाउँपालिका आसपासका क्षेत्रमा भाइरल फैलिएको बताइएको छ । भाइरलबाट सो स्थानमा ४ जनाको मृत्यु भएको बताइएको छ ।
यादवका अनुसार मृत्यू हुनेहरुमा सर्केघाट वडा नं ७ रदीकोटका ९१ वर्षीय भ्याले कार्की, ९२ वर्षीय खैरे शाही, ८८ वर्षीय गोरे जैसी र २५ वर्षीया रन्दरी नेपाली रहेका छन् ।