खानेपानीको पाइपलाइन विस्तारसँगै २५० परिवार लाभान्वित
झापा– झापाको शनिअर्जुन नगरपालिका–२ स्थित गरुवा बस्तीमा खानेपानीको पाइपलाइन विस्तार गरिएको छ ।
खानेपानी विस्तार उपभोक्ता समिति शनिअर्जुन नगरपालिका–२ को अगुवाइमा साढे तीन किलोमिटर खानेपानीको पाइपलाइन विस्तार भएसँगै सो क्षेत्रका २५० घरपरिवार लाभान्वित भएका हुन् ।
गरुवा बस्तीदेखि विरिङको फूलमती खोला किनारसम्म रु ११ लाखको लागतमा खानेपानीको पाइपलाइन विस्तार गरिएको समितिका संयोजक तुलसी श्रेष्ठले बताउनुभयो । शनिअर्जुन नगरपालिका र खुदुनाबारी, अर्जुनधारा खानेपानी तथा सरसफाइ उपभोक्ता समितिको साझेदारीमा भएको पाइपलाइन विस्तार गर्न स्थानीयवासीले समेत जनश्रमदान गरेको बताइएको छ ।
स्थानीयवासीले दुई लाख मूल्यबराबरको श्रमदान गरेको र शनिअर्जुन नगरपालिकाले रु पाँच लाख तथा खुदुनाबारी, अर्जुनधारा खानेपानी तथा सरसफाइ उपभोक्ता समितिले चार लाख रुपैयाँ प्रदान गरेको समितिका संयोजक श्रेष्ठले बताए ।