चितवन - नारायणगढ–मुग्लिन सडकखण्डको चन्डिभञ्ज्याङ गाउँ विकास समिति वडा नं ५ खहरे खोलामा आज बिहान ट्रकलाई पछाडि आउन इशारा दिँदै गर्दा ट्रकका सहचालक सडकबाट भिरमा खस्दा गम्भीर घाइते भएका छन् ।
जिल्ला प्रहरी कार्यालय चितवनले दिएको जानकारीअनुसार मुग्लिनतर्फ जाँदै गरेको ना५ख ७७३९ नंको ट्रकका सहचालक चन्द्रनिगाहपुर–१, रौतहटका २३ वर्षीय सूर्य लामा सडकबाट भिरमा खसेर बुट्यानमा अड्किएका थिए ।
बिहान ४ः१५ बजे घटना भएपछि इलाका प्रहरी कार्यालय मुग्लिनबाट गएको प्रहरीको टोलीले उद्धार गरेको थियो । गम्भीर अवस्थामा उनको चितवन मेडिकल कलेज भरतपुरमा उपचार भइरहेको प्रहरीले जनाएको छ ।
बीस दिनअघि सोही ठाउँमा बसका सहचालक खसेर बेपत्ता भएको इलाका प्रहरी कार्यालय मुग्लिनले जनाएको छ ।
तीस मजदुर प्रहरी नियन्त्रणमा
स्थायी हुनुपर्ने र तलब वृद्धि गर्नुपर्ने माग गर्दै आन्दोलनमा उत्रिएका चितवन मेडिकल कलेजमा कार्यरत नेकपा माओवादी विप्लव निकट अखिल नेपाल स्वास्थ्य तथा सरसफाइ श्रमिक मजदुर सङ्घमा आबद्ध मजदुरहरुलाई प्रहरीले आज बिहान नियन्त्रणमा लिएको छ ।
उनीहरुले अस्पतालको बहिरङ्ग सेवा बन्द गराउन खोजेपछि प्रहरीले हस्तक्षेप गरी ३० जनालाई नियन्त्रणमा लिएको प्रहरी प्रमुख प्रहरी उपरीक्षक वसन्तबहादुर कुँवरले बताउनुभयो । उनीहरुले प्रशासनको गेटमा फोहर थुपारेर प्रशासन बन्द गराएका थिए ।