अवैध काठसहित ट्याक्टर बरामद, तस्करद्वारा चलखेल
रौतहट –जिल्ला बन कार्यालय रौतहटको गस्ती टोलीले ५० क्युविफिट सालको काठ र दाउरासहित एक ट्याक्टर बरामद गरेको छ ।
बन सुरक्षाका जमदार पुण्यदेव प्रकाश बण्ठाको नेतृत्वमा गएको टोलीले सिमरी रेन्जपोष्ट अन्तरगत मैढा जंगलबाट शनिवार साँझ बेवारीसे अवस्थामा उक्त काठ सहितको ट्याक्टर बरामद गरेको हो।
नम्बर नरहेको ट्याक्टरमा आठवटा सालका गोलिया र केही दाउरा बरामद गरी बन सुरक्षा टोलीले शनिवार साँझ नै आवश्यक कार्यवाहीको लागी जिल्ला बन कार्यालय चन्द्रनिगाहपुरमा ल्याएको थियो ।
आज बिहानै उक्त खबर बारे बनले जानकारी गराउनुपर्नेमा सो नगरी तस्करहरुले रकमी चलखेल गरी काठ सहीतको ट्याक्टर छुटाउने खेलमा लागेको स्रोतले जनाएको छ ।
तर बन अधिकृत श्रीभगवान गुप्ताले काठको नाप जाँचगर्ने कर्मचारी समयमै आउन नसकेकाले ढिलो हुन गएको बताएका छन् ।
साथै ट्याक्टरमा नम्बर प्लेट नभएकाले कसको हो भनी छुटयाउन नसकीएको गुप्ताले बताए । बन स्रोतका अनुसार बरामद ट्याक्टरको चेचिस नम्बर र ईजिन नम्बरले धनीको नाम ठेगाना यातायात कार्यालय बाट जानकारी लिन सकीने भएपनी कार्यालयले त्यसो नगरी बेवारीसे घोषणा गरेर तस्करलाई बचाउने गरेका छन् ।