प्रचण्डको नेतृत्वमा राष्ट्रिय सहमतिको सरकारः बादल
शनिबार, २२ जेठ २०७३, ११ : ३७
काठमाडौं– नेकपा माओवादी केन्द्रका हेडक्वार्टर सदस्य रामबहादुर थापा बादलले प्रचण्डको नेतृत्वमा राष्ट्रिय सहमतिको सरकार अहिलेको आवश्यकता रहेको बताएका छन् । प्रेस सेन्टर नेपालले शनिबार सिन्धुलीमा गरेको पत्रकार सम्मेलनमा बोल्दै उनले माओवादी केन्द्रसँग भएको सहमतिअनुसार एमालेले प्रचण्डको नेतृत्वमा सरकार गठन गर्न सघाउनुपर्नेमा समेत जोड दिए ।
‘अहिलेको आवश्यकता भनेको राष्ट्रिय सहमतिको सरकार हो, त्यसमा प्रचण्डको नेतृत्वको आवश्यक छ’, उनले भने, ‘ एमालेले माओवादी केन्द्रसँग भएको सहमतिको पालना गर्नुपर्छ ।’
पत्रकार सम्मेलनमा माओवादी केन्द्रका अर्का हेडक्वाटर सदस्य नारायणकाजी श्रेष्ठले सरकारले ल्याएको बजेट सकारात्मक भएको बताए ।
पत्रकार सम्मेलनमा सिंचाईमन्त्री उमेश यादवको समेत सहभागिता रहेको थियो ।