सबारी तोडफोडमा संलग्न विप्लव माओवादीका केन्द्रीय सदस्य पक्राउ
इटहरी –विप्लव समुहको नेकपा माओवादीले गरेको बन्दका कारण पूर्वी नेपालका विभिन्न शहरमा प्रभाव परेको छ । विहानै देखि यातायात ठप्प भएको छ भने सुनसरीको इटहरीमा केही सवारी साधनमा तोडफोड गरिएको छ । पूर्वको मुख्य बजार सुनसरीको धरान, इटहरी, दमक, विर्तामोड लगायतमा बन्दको प्रभाव परेको छ । कालो बजारी, भ्रष्टचार महंगिको विरुद्ध संघर्ष गर्दा पक्राउ परेका बाबुराम राई बिवस लगायत सम्पुर्ण राजबन्दीहरुको रिहाईको माग गर्दे नेपाल बन्द आयोजना गरिएको नेकपा माओवादीले जनाएको छ । सडकमा जम्मा भएका बन्दकर्ताले काठमाण्डौ देखि काकडभिट्टा तर्फ गइरहेको ना ५ ख २७१२ र ना४ ख ७४०६ नम्बरको दुई ओटा बसमा तोडफोड गरेका छन् । तोडफोडमा संलग्न नेकपा माओवादीका केन्द्रिय सदस्य विक्रम अधिकारी सहित जिल्ला स्तरका अन्य दुई कार्यकर्ता नवराज भट्टराई र नवराज ढुंगाना पक्राउ परेका छन् । सुनसरीको इटहरी, धरान,इनरुवामा विहानै देखि बजार पसल खुल्न सकेका छैैनन् । सडकमा न्यून मात्रामा बन्दकर्ताको उपस्थिति रहेता पनि सम्भावित क्षतिका कारण पसल खोल्न नसकिएको व्यवसायीले बताएका छन् । यता वन्दलाई मध्यनजर गर्दै सुनसरीको सुरक्षा व्यवस्था कडा बनाएको सुनसरीका प्रहरी उपरिक्षक पोषराज पोख्रेलले बताए ।