अमेरिकी दूतावासको कर्मचारी भन्दै ठगी गर्ने पक्राउ
शुक्रबार, २८ जेठ २०७३, १५ : १५
काठमाडौं – आफूलाई अमेरिकन दूतावासको कर्मचारी भन्दै लाखौं ठगी गर्नेलाई प्रहरीले पक्राउ गरेको छ ।
ललितपुर ठेचो घर भएका सिद्धार्थ कार्कीले आफू दूतावासको कर्मचारी भएको बताउँदै ६ जना विद्यार्थीहरुसँग २ लाख ७८ हजार ठगी गरेका थिए ।
कार्कीले रुपन्देही घर भएका प्रकाश कार्कीलगायत ६ जना विद्यार्थीहरुलाई भूकम्पपीडित कोटामा प्रतिव्यक्ति ४ लाखभन्दा बढी खर्च नलाग्ने बताउँदै ठगी गरेका थिए । उनले आफू दूतावासको कर्मचारी भएकाले अमेरिका जाने भिसा लगाउन तत्काल प्रोसेसका लागि रकम चाहिन्छ भन्दै प्रकाशबाट ६५ हजार ५०० र मदन पोखरेलबाट १ लाख ५० हजार गरी ६ जनाबाट २ लाख ७८ हजार असुलेका थिए ।
विद्यार्थीहरुले प्रहरीको अपराध महाशाखामा उजुरी दिए पनि कार्कीलाई मुलपानीबाट पक्राउ गरेको थियो । उनलाई आवश्यक कारवाहीका लागि महानगरी प्रहरी परिसर काठमाडौं पठाइएको छ ।