१९ मिनेटमा मेस्सीको ह्याट्रिक
सिकागो – लियोनेल मेस्सीको ह्याट्रिकको मद्दतले अर्जेन्टिनाले १० खेलाडीमा सिमित पानामा ५–० को भारी अन्तरले पराजित गरेको छ । कोपा अमेरिकामा अर्जेन्टिनाको यो लगातार दोस्रो जित हो ।
समूह डि अन्तरगतको खेलमा मेस्सीले खेलको दोस्रो हाफमा १९ मिनेटको अन्तरालमा आफ्नो ह्याट्रिक पूरा गरेका थिए । पहिलो खेल घाइते हुँदै गुमाएका मेस्सीको जारी प्रतियोगितामा पहिलो खेल हो ।
पहिलो हाफमा बेन्चमा बिताएका मेस्सी खेलको दोस्रो हाफमा मैदानमा प्रवेश गरे । मैदान प्रवेश गरेको ८ मिनेटभित्रै उनले पहिलो गोल गरेका थिए ।
मेस्सीको यो ५३ औं अन्तर्राष्ट्रिय गोल हो । अब मेस्सी अर्जेन्टिनाका लागि सर्वाधिक गोल गरेका ग्याब्रियल बाटिस्टुटाभन्दा मात्र तीन गोलले पछि रहेका छन् ।
खेलमा अग्रता भने निकोलास ओटामेन्डीले दिलाएका थिए । खेलको सातौं मिनेटमा नै गोल गर्दै टोलीलाई अग्रता दिलाएका थिए ।
खेलको अन्त्यमा सर्जियो अगुएरोले एक गोल थपे ।
पहिलो खेलमा अर्जेन्टिनाले डिफेन्डिङ च्याम्पियन चिलीलाई पराजित गरेको थियो । जीतसँगै १४ पटकको विजेता अर्को चरणमा प्रवेश गरेको छ ।
उता, समूहको अर्को खेलमा चिलीले विवादास्पद पेनाल्टीको मद्दतले बोलिभियालाई पराजित गर्यो । १०१ औं मिनेटमा पाएको पेनाल्टीलाई गोलमा परिणत गर्दै चिलीले संघर्षपूर्ण २–१ को जीत निकाल्यो ।
खेलमा अर्टुरो भिडालले चिलीलाई अग्रता दिलाए पनि झास्मानी क्यापोसले खेल बराबरीमा ल्याए । तर, खेलको अतिरिक्त समयमा पाएको पेनाल्टीको सदुपयोग गर्दै भिडालले चिलीलाई महत्वपूर्ण तीन अंक दिलाए ।