एनसेल टावरमा आगजनीको आरोपमा विप्लव माओवादीका नेता पक्राउ
सोमबार, ३१ जेठ २०७३, १५ : ११
उदयपुर – एनसेलको टावरमा आगजनी गरेको आरोपमा नेत्रविक्रम चन्द (बिप्लव) नेतृत्वको नेकपा माओबादीका दुईजना कार्यकर्ता पक्राउ परेका छन् ।
पक्राउ पर्नेहरुमा जिल्लास्तरीय कार्यकर्ता पूर्णबहादुर तामाङ र राजन आचार्य रहेको इलाका प्रहरी कार्यालय रामपुर ठोक्सिलाले जनाएको छ । उनीहरुलाई जिल्लाको रामपुर ठोक्शीला ७ को टावरमा आगजनी गरेको आरोपमा सोमबार बिहान पक्राउ गरिएको प्रहरी उपरिक्षक नरबहादुर केसीले बताए ।
तामाङ्ग विप्लव समूहको उदयपुर क्षेत्र नं. १ का अध्यक्ष हुन भने आचार्य सचिव रहेको माओवादीका जिल्ला सेक्रेटरी केदार कुमार राईले बताए ।
टावर आगजनीमा आफ्नो पार्टीको कुनै संलग्नता नरहेको र प्रहरीले झुटा मुद्दा लगाएर फसाउन खोजेको आरोप लगाए । उनले पक्राउ परेको तामाङ्ग अपाङ्ग र आचार्य बृद्ध रहेकोले उनीहरुले आगजनी गर्न नसक्ने दावी गरे ।
ठोक्शीला ७ को गुरुङचौरीमा रहेको एनसेल टावर र जिल्लाकै रौता गाविसको वडा नं. ९ मुर्कुचीस्थित टावरमा अज्ञात समूहले आईतबार विहान एकैचोटी आगजनी गरेको जिल्ला प्रहरी कार्यालय उदयपुरले जनाएको छ ।
प्रहरीका अनुसार आगजनीबाट टावरमा के कति भयो भन्ने यकिन गर्न भने बाँकी छ । एनसेलको प्राविधिक टोलीले घटनास्थलको अनुगमन गरेपछि मात्र क्षति विवरण आउने प्रहरीले जनाएको छ ।