किसानलाई निःशुल्क सौर्य ऊर्जा पम्प
मङ्गलबार, ३२ जेठ २०७३, १३ : १८
मोरङ – कृषि विकास कार्यालयले किसानलाई निःशुल्क सौर्य ऊर्जा पम्प वितरण गरेको छ ।
आकासे पानी र विद्युत् तथा डिजेलबाट सिँचाइ गर्दै आएका किसानले अब सौर्य ऊर्जाबाटै सिँचाइ गर्न थालेका छन् । कार्यालयले पहिलो चरणमा यस वर्ष जिल्लाका तीन ठाउँमा तरकारी खेती गर्दै आएका किसानलाई सो सौर्य ऊर्जा पम्प वितरण गरेको हो ।
इटहरा– ४ मा रहेको कृषि क्रान्ति समूह, वयरवन– २ का किसान बोधनारायण राजवंशी र कटहरी –५ का अशोककुमार सिंहलाई एक÷एक थान सौर्य ऊर्जा पम्प वितरण गरिएको कृषिप्रसार अधिकृत सत्यदेव मण्डलले जानकारी दिनुभयो । सौर्य ऊर्जा पम्प प्राप्त गरेका किसानले बेमौसमी तरकारी खेती गर्दै आएका छन् । रासस