ग्लोबल आइएमईले प्यासिफिक डेभलपमेन्ट किन्ने
काठमाडौं–ग्लोबल आइएमई बैंक लिमिटेड र प्यासिफिक डेभलपमेन्ट बैंकबीच खरिद गर्ने (एक्विजिसन) सहमति पत्रमा हस्ताक्षर भएको छ । ग्लोवल आइएमई र लमजुङ जिल्लामा कार्यक्षेत्र रहेको प्यासिफिकबीच वुधवार समझदारी पत्रमा हस्ताक्षर भएको हो । ग्लोबल आइएमई बैंकका तर्फबाट अध्यक्ष चन्द्र प्रसाद ढकाल र प्यासिफिक डेभलपमेन्ट बैंकका तर्फबाट अध्यक्ष भेष बहादुर पौडेलले सो सहमति पत्रमा हस्ताक्षर गरेका हुन् । दुवै बैंकविच एक्विजिसन सम्बन्धी सम्पूर्ण काम ३ महिना भित्र सम्पन्न हुने र एकीकृत कारोवार सुरु हुने जनाइएको छ । लमजुङ जिल्लालाई कार्यक्षेत्र बनाई एक जिल्ले विकास बैंकको रुपमा विगत ७ वर्षदेखि कारोबार गर्दै आईरहेको प्यासिफिक डेभलपमेन्ट बैंकको कुल चुक्ता पुँजी ११ करोड रुपैयाँ रहेको छ । प्यासिफिक डेभलपमेन्ट बैंकलाई ग्लोबल आइएमई बैंकले एक्विजिसन गरेपछि बैंकको कुल चुक्ता पुँजी ६ अर्व २७ करोड, कुल निक्षेप ७१ अर्व, कर्जा लगानी ६१ अर्व र ९४ वटा शाखा कार्यालय पुग्नेछन् । ग्लोबल आईएमई बैंकले यसअघि कर्मज एण्ड ट्रष्ट बैंक, आईएमई फाइनान्सियल इन्स्टिच्युसन, गुल्मी विकास बैंक, सोसियल डेभलपमेन्ट बैंक र लर्ड बुद्ध फाईनान्ससंग सफल मर्जर गरिसकेको छ ।