काठमाडौं– काबुल आक्रमणमा मारिएका १२ नेपाली तथा घाइते लिन आज बिहान अफगानिस्थान पुगेको नेपाल वायु सेवा निगमको जहाज केहिबेरअघि काठमाडौंको लागि प्रस्थान गरेको छ । आरएनए २४२२ कल साइनको  जहाज मृतक तथा घाइते लिएर काठमाडौंका लागि प्रस्थान गरेको हो ।

आजै बिहान ३ बजे काठमाडौंबाट उडेको जहाज ७ बजे काबुलमा अवतरण भएको थियो । अफागनिस्तानमा गर्नुपर्ने आवश्यक प्रक्रिया पूरा गरी विमानमा मृतक र घाइतेका साथै घर फर्कने चाहने केहि नेपालीहरुलाई ल्याइएको परराष्ट्र मन्त्रालयले जनाएको छ ।

काबुलबाट शव ल्याउन तथा आवश्यक सहयोग र समन्वय गर्न सेनाको मेडिकल टिमसहित चार, प्रहरीबाट तीन, गृहबाट एक, परराष्ट्रबाट एक, वैदेशिक रोजगार प्रवद्र्धन बोर्डबाट एक जना सो विमानमा गएका छन् ।

विमानको उडान तथा अवतरणको आवश्यक अनुमति सम्बन्धित अधिकारीबाट प्राप्त भएसँगै बिहान जहाज त्यसतर्फ पठाइएको परराष्ट्र मन्त्रालयका प्रवक्ता भरत पौडेलले जानकारी दिए ।

सोमबार भएको आतङ्ककारी आक्रमणमा परी १२ नेपालीको निधन भएको थियो भने ७ जना घाइते भएका थिए ।