राजविराज – चार दिनदेखि लगातार परेको पानीका कारण आएको बाढीले बुधवारदेखि सप्तरीको राजविराज–कुनौली भन्सार सडक खण्ड अवरुद्ध भएको छ ।

सदरमुकाम राजविराजबाट भारतीय सिमावर्ती क्षेत्रसम्म जाने उक्त सडक अवरुद्ध भएपछि भारतीय क्षेत्रमा आउजाउ गर्ने सर्वसाधारण समस्यामा परेका छन् । बाटोमा सवारी साधनको आवागमन रोकिँदा व्यापारीको माल समान समेत आयात हुन सकेको छैन । कुनौली स्थित सप्तरी खण्डमा रहेको राजविराज भन्सार कार्यालयको राजस्व संकलन कार्य समेत उक्त सडक अवरोधका कारण प्रभावित हुन पुगेको छ ।

कुनौली आसपासका तिलाठी, वरही विरपुर, इटहरी विष्णुपुर, लालापट्टि, रमपुरा मल्हनियाँ, सकरपुरा लगायतका गाविसका वासिन्दाहरुलाई सर समान खरिद गर्नका लागि समेत समस्या भएको छ । ती गाविसका वासिन्दाले दैनिक आवश्यकताका सरसमान भारतको कुनौली बजारबाटै किनेर ल्याउने गरेका छन् ।

अत्यधिक बाढीले गर्दा आवामगनका लागि बनाइएको डाईभर्सन भत्काएपछि आवागमनमा समस्या भएको सडक डिभिजन कार्यालय लहानका इन्जिनियर सोभितलाल ठाकुरले बताए ।

‘ढुंगा लगायतका सामाग्री नपाइएकाले पुल बनाउन सकिएको छैन’ उनले भने ‘तत्काल बनाइएको डाईभर्सन पनि खाडो नदीबाट आएको बाढीले बगाएको छ, हामी बाटो छिटै सञ्चालन गराउने प्रयासमा छौ ।’