स्याङ्जाको राङ्भाङमा मेकाडेमिया नट खेती सुरु
पोखरा - स्याङजाको राङभाङ गाविस–३ भैंसे गौंडामा मेकाडेमिया नट अर्थात अष्ट्रेलियन कटुस खेती सुरु गरिएको छ ।
स्थानीय राङभाङ मेकाडेमिया कृषक समूहका व्यवस्थापन, जिल्ला कृषि विकास कार्यालय स्याङजाको आर्थिक सहयोग र वागवानी अनुसन्धान केन्द्र पोखराको प्राविधीक सहयोगमा सो खेती सुरु गरिएको हो ।
खेती गर्न छोडिएको करिव २० रोपनी जग्गामा २ हजार १ सय विरुवा सार्ने योजना सहित सो खेतीको सुरुवात गरिएको छ । जसको लागि विरुवा भने सो संस्थाले आफैँ तयार पारेको संस्थाका अध्यक्ष वालकुमार गुरुङले जानकारी दिएका छन् ।
जिल्ला कृषि विकास कार्यालय स्याङजाका वरिष्ठ कृषि विकास अधिकृत तेजप्रसाद दवाडीले शुक्रवार सो खेतीको शुभारम्भ गर्दै विदेशी कटुस नेपालमा खेती गर्न सकेमा स्थानीय कृषकको आय आर्जन वढ्ने बताएका छन् ।
कृषकले एक गाउँ एक उत्पादनको नारासहित उत्पादन गर्न थालेका हरेक वाली नालीमा जिल्ला कृषि विकास कार्यालयले सहयोग गर्ने वरिष्ट कृषि विकास अधिकृत दवाडीले बताए ।
पोखराको पृथ्वीचोकमा रहेको भद्रकाली नर्सरीका संचालक एवं स्थानीय वासिन्दा प्रेमवहादुर रानाको सक्रियतामा गाउँमा मेकाडेमिया कृषक समूह गठन गरी गाउँका २३ जना कृषकले सो खेतीको सुरुवात गरेका हुन् ।
गाउँमा वाँझो भएर खेर गएको जग्गालाई उपयोगमा ल्याउन सो समूह गठन गरी खेती सुरु गरिएको स्थानीय प्रेमवहादुर रानाले बताए ।
सो अवसरमा समाजसेवी धनप्रसाद गुरुङ, शेषवहादुर थापा र वागवानी अनुसन्धान केन्द्र पोखराका प्राविधीक अधिकृत सूर्यप्रसाद दाहालले आ– आफ्ना भनाई राखेका थिए ।