वेस्ट भर्जिनियाको बाढीमा मृत्यु हुनेको सङ्ख्या २३ पुग्यो
वासिङटन- अमेरिकाको वेस्ट भर्जिनियामा आएको बाढीमा परी ज्यान जानेको सङ्ख्या २३ पुगेको समाचार छ ।
अमेरिकी अधिकारीहरुले दिएको जानकारीअनुसार सो क्षेत्रमा ठूलो सङ्ख्याका सर्वसाधारण नागरिक रुखमा चढेर तथा कतिपय स्थानमा घरको छाना र छतमा बसेर ज्यान जोगाइरहेका छन् ।
उद्वारकर्मीहरुले उद्वारको कार्यलाई तिब्रता दिएका छन् । अधिकारीहरुले भनेका छन् सो क्षेत्रमा क्षतिको मात्रा निकै ठूलो रहेको छ । उनीहरुले उद्वारको कामलाई निकै तदारुकता दिएका छन् ।
शुक्रबार दिउसोसम्ममा १४ जनाको मात्र निधन भएको थियो । राति अबेरतिर आएको बाढीमा परी थप नौ जनाको ज्यान गएको हो ।
एकजना आठ वर्षीय बालक उसको आमा र दिदीसँग हिँडीरहेका बेला अकस्मात आएको बाढीले बगाएको थियो । उसको शव तीन घन्टापछि भेटिएको थियो ।
यसरी बाढीमा पर्ने र भौतिक क्षति हुनेको सङ्ख्या निकै धेरै रहेको छ । सयौँ घर परिवार घरबारबिहीन भएका बताइएको छ ।
शुक्रबार अबेरसम्ममा कम्तीमा पनि ५०० जना मानिस बाढीका कारण अलपत्र परिरहेका छन् । उनीहरुले आफ्नो ज्यान मात्र जोगाउन सकिरहेकोले सेना र प्रहरीले उद्वारको कामलाई तिब्रता दिइएको जनाएका छन् ।
गए राति नै करिब १७ वटा शिविर बनाएर विभिन्न स्थानमा उनीहरुलाई राखिरहेका छन् । बाढीको प्रकोप कम भएको छैन ।
त्यसैले सुरक्षाकर्मीहरुले यस्तो अवस्थाका नागरिकलाई कतै पनि ननिस्किन र घर वा अन्यत्रै भएमा पनि सुरक्षितसाथ बस्न सूचना जारी गरिरहेको छ ।