काठमाडौं – जारी युरोकपमा पोल्याण्डले स्वीटरल्याण्डविरुद्ध ऐतिहासिक जित दर्ता गरेको छ । शनिबार राती भएको खेलमा पोल्याण्डले टाइब्रेकरमा स्वीटरल्याण्डलाई ५–४ ले हराउँदै पहिलोपटक क्वाटरफाइनलमा पुग्न सफल भयो । हारसँगै स्वीटरल्याण्ड भने प्रतियोगिताबाट बाहिरियो । निर्धारित ९० मिनेट र अतिरिक्त समयको खेल एक एकको बराबरीमा पुगेपछि खेल टाइब्रेकरमा पुगेको थियो । यसअघि खेलको ३९ औँ मिनेटमा ज्याकुब ब्लास्कचेकोस्की पोल्याण्डका लागि गोल गरेर अग्रता दिलाएपनि ८२ औँ मिनेटमा स्वीट्जरल्याण्डका शाक्विरीले बराबरी गोल गरे । तर त्यसपछि दुबै समुहबाट गोल हुन नसकेपछि खेल टाइब्रेकरमा पुगेको हो । जसमा पोल्याण्डले एतिहासिक जित दर्ता गर्न सफल भयो ।