२ दिनकी शिशु बेवारिसे अवस्थामा जिउँदै भेटिएपछि...
मङ्गलबार, २१ असार २०७३, १७ : ४१
वीरगंज–हेर्दै लोभलाग्दो सुन्दर करिब २ दिनकी नवजात शिशु जनकपुर उपमहानगरपालिका–१४ स्थित पिडारी चोकको पछयारिया टोलमा फालिएको बेवारिसे अवस्थामा फेला परेको छ । रेल्वे लिकको उत्तरतर्फ १०० मिटर खाली चौरमा शिशु भेटिएको हो ।
जन्म भएको दुई दिनको जस्तो देखिने शिशु बेवारिसे तवरबाट फालिएको अवस्थामा स्थानीय बासिन्दाले देखेपछि ईलाका प्रहरी कार्यालय मुझेलिया जनकपुरमा खबर गरेका थिए ।
प्रहरी टोलीले तत्काल उद्दार गरी जनकपुर अञ्चल अस्पतालमा उपचारका लागि राखिएको छ । उक्त शिशु कसको हो भन्ने कुरा खुलेको छैन । बालिका के कसरी फालिएको हो त्यस सम्बन्धमा अनुसन्धान सुरु गरिएको जिल्ला प्रहरी कार्यालय धनुषाले जनाएको छ ।