बलात्कार अभियोगमा ‘पीपली लाइभ’ का सह–निर्देशकलाई ७ वर्षको जेल सजायँ
शुक्रबार, २१ साउन २०७३, १२ : ५६
चर्चित बलिउड फिल्म ‘पीपली लाइभ’ का सह–निर्देशक महमूद फारुकीलाई एक अमेरिकी छात्रामाथि बलात्कार गरेको आरोपमा ७ वर्षको जेल सजायँ सुनाइएको छ । दिल्ली कोर्टले उनीमाथि ८० हजार जरिवानासमेत लगाएको छ । कोर्टका अनुसार यदि फारुकीले जरिवाना नतिरे उनको सजायँ तीन महिना बढोत्तरी हुने बताइएको छ ।
सजायँ तोकिएलगत्तै उजुरीकर्ताका वकिलले फारुकीले आफ्नो घरमा खानाका लागि बोलाउँदै महिला छात्रामाथि बलात्कार गरेकोमा उनलाई धेरैभन्दा धेरै सजायँ पाउनुपर्ने माग गरेका छन् । वकिलका अनुसार उनले ‘मित्रता र विश्वास’ सँग विश्वासघात गरेका छन् ।
यता फारुखीका वकिलले भने दोषीले राम्रो आचरणको परिचय दिएको र पीडितालाई धाकधम्की दिने प्रयास नगरेको बताउँदै उनको सजायँमा केही कटौती गर्नुपर्ने माग राखे ।
अमेरिकी छात्रालाई बलात्कार गरेको आरोपमा ‘पीपली लाइभ’ का सह–निर्देशक दोषी ठहर
स्रोतका अनुसार फारुखीले पीडित महिलालाई २८ मार्च, २०१५ मा आफ्नो घरमा खाना खानका लागि बोलाएका थिए जहाँ उनले उनीमाथि बलात्कार गरेका थिए ।
पुलिसको आरोपपत्र अनुसार पीडिता निर्देशकको घरमा पौने ९ बजे पुगिन् जहाँ निर्देशक नशाले चुर भएका थिए । निर्देशकले पीडितालाई उनको कार्यालय भएको कोठामा जान आग्रह गरे जहाँ उनले पीडितालाई बलात्कार गरे । बलात्कार पछि पीडिता निकै डराएको पनि बताइएको छ ।