सुनको भाउ तोलामा ४ सय महंगियो
मङ्गलबार, ३२ साउन २०७३, ११ : ३०
काठमाडौ–महिनाको अन्तिम दिन मंगलबार नेपाली बजारमा सुनको भाउ प्रतितोला ४ सय रुपैयाँ महंगिएको छ । तीन दिनसम्म स्थिर रहेको सुनको भाउ महंगिएपछि कारोवार भने घटेको छ । नेपाल सुनचाँदी व्यवसायी महासंघका अनुसार मंगलबार छापावाल सुन प्रतितोला ५९ हजार ३ सय, तेजावी सुन ५९ हजार ५० रुपैयाँ र चाँदी ८ सय ९५ रुपैयाँ प्रतितोलामा कारोवार भइरहेको छ । अघिल्लो दिन भने छापावाल सुन तोलामा ५८ हजार ९ सय, तेजावी ५८ हजार ६ सय ५० र चाँदी ८ सय ९० रुपैयाँमा कारोवार भएको थियो । अहिले सुनको कारोवार हुने मुख्य सिजन रहेको भएपनि भाउ आकासिएकाले कारोवार हुननसकेको व्यवसायीको भनाइ छ । तीज नजिकिएकाले यो समय सुनको कारोवार बढ्ने सिजन हो । तर, अन्तर्राष्ट्रिय बजार भाउकै कारण नेपाली बजारमा पनि सुन महंगिएकाले कारोवार कम भएको छ ।