काठमाडौ – सूचना प्रविधि मेला ‘क्यान इन्फोटेक २०१७’ सुुरु भएको छ ।

काठमाडौंको भृकुटीमण्डपमा बिहिबार एक कार्यक्रमका बीच उपप्रधान तथा अर्थ मन्त्री कृष्णबहादुर महराले उदघाटन गरेर मेला सुरु भएको हो । मेलामा विभिन्न राष्ट्रिय तथा अन्तर्राष्ट्रिय कम्पनीहरुका २ सय २२ स्टल रहेका छन् ।

कम्प्युटर एसोसिएसन नेपाल (क्यान) को आयोजनामा हरेक वर्ष हुने मेलामा विभिन्न कम्पनीका नयाँ उत्पादन, सेवा र उपभोक्ता योजना सार्वजनिक हुने गरेका छन । क्यानको २३ औं संस्करणको प्रर्दशनीमा कम्प्युटर हार्डवेयर सेल्स तथा मेन्टिनेन्स, पावर सोलुसन, मोबाइल एसोसरिज, डिलर डिस्ट्रिव्युसन र इन्टरनेट सेवा प्रदायकहरु सहभागी छन् ।

मेलामा डिजिटल टिभी, उच्च क्षमता भएका इन्टरनेट सेवा प्रदायक र सामसुङका सुविधा सम्पन्न आधुनिक मोबाइल सेटहरु मुख्य आकर्षणको केन्द्र रहने आयोजकको दावी छ । यसैगरी सरकारले परिकल्पना गरेको स्मार्ट सिटीको आधारभूत पूर्वाधार र साइबर अपराध नियन्त्रणका उपायका बारेमा पनि मेलामा जानकारी गराइने बताइएको छ ।

मेलामा ४ लाख अवलोकनकर्ता प्रत्यक्ष सहभागि हुने अपेक्षा गरिएको छ । मेलामा सुविसु र सामसुङ, मर्कनटाइल र नेपाल टेलिकमलगायतका कम्पनी मुख्य प्रायोजक रहेका छन् । मेला यही माघ १८ गतेसम्म चल्नेछ ।