रोनाल्डोको प्रेरणामा रियललाई शीर्ष स्थानमा ४ अंकको अग्रता
म्याड्रिड – बार्सिलोना र सेभिया दुवैले अंक गुमाएको फाइदा उठाउँदै रियल म्याड्रिडले रियल सोसिडाडलाई पराजित गर्दै शीर्ष स्थानमा चार अंकको अग्रता बनाएको छ ।
रियलको जीतमा नायक बन्दै क्रिस्टियानो रोनाल्डोले एक गोलको अवसर सृजना गरे भने एक गोल गरे ।
रोनाल्डोको पासमा माटेयो कोभाचिचले खेलको ३८ औँ मिनेटमा गोल गर्दै रियललाई अग्रता दिलाए । खेलको दोस्रो हाफमा सोसिडाडका गोलकिपर जेरोनिमो रुलीलाई चिप गर्दै रियलको अग्रता दोब्बर बनाए । पछिल्ला १३ खेलमा रोनाल्डोको यो १३ औँ गोल हो ।
खेलको ७४ औँ मिनेटमा सोसिडाडका इनिगो मार्टिनेज रातो कार्ड खाँदै बाहिरिएपछि पाहुना टोली १० खेलाडीमा सिमित बनेको थियो ।
त्यसपछि अल्भारो मोराटाले लुकास भाजक्वेजको क्रसलाई गोलमा परिणत गर्दै रियललाई सहज दिलाए ।
यो हप्ता शीर्ष चारमा रहेको टोलीमध्ये जीत हासिल गर्ने रियल एक मात्र टोली बन्यो ।
बार्सिलोना रियल बेटिससँग रोकियो भने सेभिया इस्पानियोलसँग पराजित भयो भने एथ्लेटिको अलाभेससँग गोलरहित बराबरीमा रोकिएको थियो ।