फेसबुकका लगानीकर्ता जुकरबर्गबाट रुष्ट, अध्यक्षबाट हटाउन प्रस्ताव
न्युयोर्क – सामाजिक सञ्जाल फेसबुकका केही लगानीकर्ताले संस्थापक मार्क जुकरबर्गलाई कम्पनीको बोर्ड अफ डाइरेक्टर तथा कम्पनीको सिइओबाट हटाउन प्रस्ताव गरेका छन् ।
फेसबुकमा सेयर रहेको समअफअस नामक कर्पोरेट वाच ग्रुपले उनलाई हटाउन माग गर्दै प्रस्ताव अघि सारेको हो ।
भेन्चरबिटका अनुसार हालसम्म ३३३,००० जनाले हस्ताक्षर गरेको प्रस्ताव फेसबुकमा दर्ता गरिउको छ ।
यद्यपि, ३३३,००० जना मध्ये १५ सय जनासँग मात्र फेसबुकको सेयर रहेको छ ।
आफूलाई कर्पोरेसनहरुको बढ्दो शक्तिलाई नियन्त्रण गर्न समर्पित संस्था बताउने समअफअसले फेसबुकमा स्वतन्त्र व्यक्तिलाई सिइओ बनाउन प्रस्ताव गरेको छ ।
जुकरबर्ग फेसबुकका संस्थापक र सिइओ तथा बोर्ड अफ डाइरेक्टरका अध्यक्ष हुन् । उनीसँग फेसबुकको अधिकांश शेयर रहेको छ ।
समअफअसको प्रस्तावले फेसबुकको निर्णयमा कुनै असर नगर्ने जानकारहरुले बताएका छन् ।
यसअघि एप्पलका संस्थापक स्टिभ जब्सलाई पनि लगानीकर्ताहरुले कम्पनीको बोर्ड अफ डाइरेक्टरबाट हटाउन माग गरेका थिए ।