यी हुन् एमालेबाट मन्त्रीको शपथ र जिम्मेवारी लिने मन्त्रालय, उप्रेतीले पाए रक्षा
काठमाडौँ । नेकपा (एमाले) बाट राज्यमन्त्री नहुने भएका छन् । सत्ता साझेदार दलमा भएको भागबण्डा अनुसार एमालेले आठ मन्त्री मात्रै लिने भएको हो ।
आज हुने मन्त्रिपरिषद् विस्तारमा एमालेले चार नयाँलाई मन्त्रीको शपथ गराउँदैछ । मंगलबार अध्यक्ष केपी शर्मा ओलीसहित केही शीर्ष नेताहरूले थप चार मन्त्रीको नाम टुङ्गो लगाएका हुन् । एमाले उपमहासचिव विष्णु रिमालका अनुसार एमालेबाट डा. विमला राई पौडेल परराष्ट्र, पदम गिरी स्वास्थ्य तथा जनसंख्या, भगवती चौधरी महिला, बालबालिका तथा ज्येष्ठ नागरिक र हरि उप्रेती रक्षामन्त्री बन्नेछन् ।
यसअघि मन्त्री बनेका चारमध्ये विष्णु पौडेलले मात्र उपप्रधानसहित अर्थ मन्त्रालयको जिम्मेवारी पाएका थिए । आज शपथ खाने मन्त्रीमध्ये राजेन्द्र राईले भूमि व्यवस्था, ज्वाला साहले कृषि र दामोदर भण्डारीले उद्योग मन्त्रालयको जिम्मेवारी पाउने भएका छन् ।