यू–१९ पुरुष विश्वकप एसिया छनोट : हङकङसँग खेल्दै नेपाल
काठमाडौं । आईसीसी यू–१९ पुरुष विश्वकपको एसिया छनोट प्रतियोगितामा नेपालले आज (सोमबार) हङकङसँग खेल्दै छ ।
यूएईमा जारी रहेको प्रतियोगिताको लगातार दुई खेलमा सहज जित निकालेको नेपालले तेस्रो खेलमा हङकङको सामना गर्दैछ । दुई टोलीबीचको खेल नेपाली समयअनुसार बिहान १०ः४५ बाट सुरु हुनेछ ।
नेपाल आजको खेलमा सहज जित निकाल्दै पहिलाको लयलाई कायम राख्न चाहन्छ । नेपाली टोली अहिले बलियो अवस्थामा छ । पहिलो र दोस्रो खेलमा नेपालले सहज जित निकालेका कारण नै आजको खेलमा सहज हुनेछ ।
नेपालले पहिलो खेलमा शुक्रबार सिंगापुरलाई र दोस्रो खेलमा शनिबार कुवेतलाई पराजित गरेको थियो । यता हङकङ भने दोस्रो जित निकाल्ने योजनामा हुनेछ । हङकङले पहिलो खेलमा कुवेतलाई हराएको थियो भने दोस्रो खेलमा यूएईसँग हार बेहोरेको थियो ।
प्रतियोगितामा नेपालसहित सिंगापुर, कुवेत, हङकङ, मलेसिया र आयोजक यूएईको सहभागिता रहेको छ । चौथो खेलमा २८ तारिख मंगलबार मलेसियाको सामना गर्ने छ । राउण्ड रोबिनका आधारमा हुने प्रतियोगिताको शीर्ष टोली २०२४ मा श्रीलङ्कामा हुने यू–१९ विश्वकपका लागि छनोट हुनेछ ।