आइतबार, ०६ असोज २०८१
ताजा लोकप्रिय

राष्ट्रपति निर्वाचनमा खुलेनन् यी पाँच दल, आचारसंहिताले राेक्याे !

बुधबार, २४ फागुन २०७९, ०७ : ४०
बुधबार, २४ फागुन २०७९

काठमाडौँ । राष्ट्रपति निर्वाचनका लागि सङ्घीय संसद् र प्रदेश संसद्मा आबद्ध सबै राजनीतिक दलले पक्षधरता देखाए पनि केही राजनीतिक दलले कसलाई मत दिने भन्नेबारे अझै खुलेका छैनन् ।

बिहीबार हुने राष्ट्रपति निर्वाचनका लागि सङ्घीय संसद्मा रहेका तीनवटा दल र प्रदेश संसद्मा रहेका २ दल गरी पाँच राजनीतिक दलले राष्ट्रपति निर्वाचनमा कसलाई मत दिने भन्नेबारे नखुलेका हुन् । 

यसरी खुल्न नसकेका सङ्घीय संसद्मा प्रतिनिधित्व गर्ने राजनीतिक दलहरुमा राष्ट्रिय प्रजातन्त्र पार्टी (राप्रपा), राष्ट्रिय स्वतन्त्र पार्टी (रास्वपा) र  नेपाल मजदुर किसान पार्टी (नेमकिपा) रहेका छन् भने प्रदेश संसद्मा प्रतिनिधित्व गर्ने हाम्रो नेपाली पार्टी र सङ्घीय समाजवादी पार्टी रहेका छन् ।

राष्ट्रपति निर्वाचनको बारेमा निर्णय गर्नका लागि राप्रपाको केन्द्रीय कार्यसम्पादन समितिको बैठक आज बस्दैछ भने रास्वपाले सङ्घीय संसदीय दलको बैठक बोलाएको छ । दुवै पक्षले राष्ट्रपति निर्वाचनबारे आवश्यक निर्णय दिने भएका छन् । 

राष्ट्रपति निर्वाचनका लागि सत्तारुढ ९ दलीय गठबन्धनबाट नेपाली कांग्रेसका सांसद रामचन्द्र पौडेल उम्मेदवार छन् भने प्रतिपक्षी दलबाट नेकपा एमालेका सुवासचन्द्र नेम्वाङ उम्मेदवार छन् । 

आचारसंहिताले खुल्न नपाइने

राष्ट्रपति निर्वाचनका लागि गत फागुन १७ गतेबाट नै निर्वाचन आचारसंहिता लागु भएकाले कुनै उम्मेदवारको पक्षमा खुल्न भने पाइने छैन ।

प्रमुख निर्वाचन आयुक्त दिनेशकुमार थपलियाले निर्वाचन आचारसंहिता लागु भइसकेकाले राजनीतिक दलले पक्षधरता देखाउन नपाउने बताए ।

न्युज कारखाना

खबर पढेर तपाईलाई कस्तो महसुस भयो ?

प्रतिक्रिया

लेखकको बारेमा

रातोपाटी
रातोपाटी

‘सबैको, सबैभन्दा राम्रो’ रातोपाटी डटकम । 

लेखकबाट थप