‘गोल मेसिन’ हालान्डको नयाँ कीर्तिमान
म्यानचेस्टर । बायर्न म्युनिखलाई हराउने क्रममा गोल गर्दै अर्लिङ हालान्डले नयाँ कीर्तिमान बनाउन सफल भएका छन् । २२ वर्षीय स्ट्राइकर कुनै पनि सिजनमा सर्वाधिक गोल गर्ने प्रिमियर लिगका खेलाडी बनेका हुन् ।
च्याम्पियन्स लिगको क्वार्टरफाइनलको पहिलो लेगमा बायर्नलाई ३–० गोलले हराउने क्रममा नर्वेका खेलाडीले खेलको ७६ औँ मिनेटमा गोल गरेका थिए । सिटीका लागि यो सिजन उनको ४५ औँ गोल थियो । उनले यो उपलब्धि मात्र ३९ औँ खेलमा हासिल गरेका हुन् । कुनै पनि प्रिमियर लिगका खेलाडीले सबै प्रतियोगितामा गरेको गोलका लागि नयाँ कीर्तिमान हो ।
यसअघि रुड भान निस्टलरोयले सन् २००२–०३ सिजनमा र मोहमद शालहाले सन् २०१७–१८ सिजनमा लिभरपुलका लागि एकै सिजनमा ४४ गोल गरेका थिए ।
त्यस्तै, जर्मन च्याम्पियनविरुद्ध सात खेलमा उनको पाँचौँ गोल थियो । बोरुसिया डर्टमण्डमा हुँदा हालन्डले बायर्नविरुद्ध कयौँपटक खेलेपनि यसअघि उनले जीत भने हासिल गर्न सकेका थिएनन् ।