जग्गा बैना गर्ने नाममा लुटपाट, ४ जना पक्राउ
काठमाडौँ । जग्गा बैना गर्ने नाममा लुटपाट गरी भाग्ने चार जना पक्राउ परेका छन् ।
बिहीबार झापाको बिर्तामोडबाट लुटपाट गरेर भागेका उनीहरुलाई प्रहरीले शुक्रबार इलामबाट पक्राउ गरेको हो । प्रहरीका अनुसार बिर्तामोड बसपार्क नजिकै दुई कट्टा जग्गा किन्नका लागि मोरङको उर्लाबारीबाट आएका विष्णुमाया सापकोटा (सुवेदी) र अनिल विश्वकर्माको ३२ लाख रुपैयाँ लुटेर जग्गा कारोबारी फरार भएका थिए ।
सस्तोमा जग्गा पाइएको छ आजै बैना गर्न आउनु भनेर उनीहरूलाई बोलाई ३२ लाख रुपैयाँ चार जना इलाम भागेको जिल्ला प्रहरी कार्यालय झापाका सूचना अधिकारी खगेन्द्र प्रसाद रिजालले जानकारी दिए ।
रिजालका अनुसार जग्गा बैना गर्ने नाममा रकम लुटपाट गर्नेमा झापाको कमल गाउँपालिका-५ बस्ने विजय राई, बेलबारी नगरपालिका-६ घर भई झापाको मेचीनगर नगरपालिका-६ बस्ने ५५ वर्षीय रणबहादुर पोख्रेल, काठमाडौँका राजेश श्रेष्ठ र जनक रेग्मी रहेका छन् ।
चार जनाले पूर्वनिर्धारित योजनाअनुसार जग्गा खरिदकर्ता विष्णुमायाको ३२ लाख लुटेर फरार भएका प्रहरीले जनाएको छ ।