गरिबीका विरुद्ध एकजुट होऔँ
हरेक बिहान
दूधे बालकहरूको रोदनसँगै
बिउँझिन्छ गरिबी
हरेक साँझ मजदुर, किसानको
भोको पेटसँगै
निदाउँछ गरिबी
यो आउँछ
गाउँ बस्तीहरूमा
सारङ्गी पेट लिएर
र, भोकाएका बच्चाहरूको
घाँटी निमोठेर जान्छ ।
यो आउँछ
कोलाहल सहरका गल्लीहरूमा
र, रंगीन सपनाहरूको
जरा उखेलेर जान्छ ।
यो आउँछ
सबै स्थानमा कष्ट पीडा बोकेर
र, जान्छ रोग, भोक र शोक दिएर
यो आउँछ
अभाव र अन्तहीन विपत्ति बोकेर
र, जान्छ बिर्सिनै नसक्ने
अनिकालको मृत्यु दिएर
गरिबी एक विपत्ति हो
एक कठोर वास्तविकता पनि हो
यो विश्वले झेलेको छ वर्षौँदेखि
मानवता माथिको कालो दाग यो
जो समाजमा विद्यमान छ युगौँदेखि
विश्वलाई गरिबीबाट मुक्त गर्न
समृद्धिको आशा जगाउन
सामर्थ्यका साथ उठ्नुपर्छ
गरिबीका विरुद्ध संघर्षको
ढोका खोल्न जुट्नुपर्छ ।
विश्वका सबै राष्ट्र एक भएपछि
के हुँदैन र यहाँ ?
एउटा सानो कदमले त बदलिन्छ
मानिसको जिन्दगी
बदलिन्छ समाज
बदलिन्छ विश्व
आऔँ, सबै एकजुट भई लडौँ
गरिबीका विरुद्ध
बालौँ, मसाल गरिबीका विरुद्ध
बनाऔँ, योजना गरिबीका विरुद्ध ।।