जबरजस्ती करणीको भिडियो देखाएर ६ वर्षदेखि बलात्कार !
विराटनगर । १५ वर्षी बालिकालाई जबरजस्ती करणी गरेको भिडियो बनाएर ब्ल्याकमेल गर्दै आएका एक युवक पक्राउ परेका छन् ।
बालिकालाई उनले भिडियो सार्वजनिक गरिदिने धम्की दिँदै विगत ६ वर्षदेखि पटकपटक बलात्कार गरेको प्रहरीले जनाएको छ ।
प्रहरीका अनुसार विराटनगर– ६ का ३० वर्षीय व्यापारी मो.परिजवान अन्सारी उजुरीपछि पक्राउ परेका छन् ।
अन्सारीले २०७४ सालमा १५ वर्षकी ती युवतीलाई जबरजस्ती करणी गरेको प्रहरीले बताएको छ । सोही बेला बनाएको भिडियो सार्वजनिक गर्ने त्रास देखाउँदै उनले बालिकालाई पटकपटक बलात्कार गरेको मोरङका प्रहरी प्रवक्ता डिएसपी रन्जनकुमार दाहालले जानकारी दिए ।
बलात्कारको शिकार बनेकी ती किशोरीको दुई पटक गर्भ बसेको जनाइएको छ । उक्त गर्भ पतन गराएको खुलेको प्रहरीको दाबी छ । ‘उनले भनेको र गरेको मानेन भने भिडियो सामाजिक संजालमा हालेर भाइरल गराउने डर त्रास देखाउने गरेको थियो । त्यही अश्लील भिडियो बनाएपछि ब्यालकमेलिङ गर्दै जबरजस्ती करणी गरेको छ । करणी गरेपछि बसेको गर्भ दुई पटक पतन पनि गराएको छ,’ ती किशोरीले प्रहरीलाई दिएको जाहेरीमा उल्लेख छ ।
पक्राउ परेका अन्सारीविरुद्ध मोरङ प्रहरीले जबरजस्ती करणी, गर्भ संरक्षणको कसुर र विद्युतीय कारोबार ऐनमा म्याद थप गरी अनुसन्धान सुरु गरेको छ । किशोरीको अश्लील भिडियो अन्सारीले फेक फेसबुक अकाउन्ट बनाएर हाल्ने गरेका थिए । त्यसपछि उनी पक्राउ परेका हुन् ।