काठमाडौँ । नेपालीलाई नक्कली भुटानी शरणार्थी बनाएर अमेरिका पठाउने नाममा ठगी गरेको आरोपमा पक्राउ पुर्जी (वारेन्ट) जारी भएका ४ जना प्रहरीको खोजी सूचीमा रहेका छन् । 

प्रहरीले सो प्रकरणमा अनुसन्धानका लागि पूर्वउपप्रधानमन्त्री एवम् एमाले नेता टोपबहादुर रायमाझी, तत्कालीन गृहमन्त्री रामबहदुर थापाका छोरा प्रतिक, पूर्वसभासद आङ्टावा शेर्पाविरुद्ध जिल्ला अदालत काठमाडौँबाट पक्राउ पुर्जी जारी गरेको छ । 

यस्तै तत्कालीन गृहमन्त्री बादलकै सुरक्षा सल्लाहकार इन्द्रजित राईका छाेरा निरजविरुद्ध पनि पक्राउ पुर्जी जारी गरेको छ । तर, चारै जना अहिले फरार रहेपछि प्रहरीले सम्भावित स्थानमा खोजतलासलाई तीव्र बनाइरहेको छ । 

पूर्वउपप्रधानमन्त्री टोपबहादुर रायमाझीविरुद्ध वैशाख २० गते प्रहरीले पक्राउ पुर्जी जारी गरेको थियो । पक्राउ पुर्जी जारी भएको खबर सञ्चामाध्यममा आउँदा उनी गृहजिल्ला अर्घाखाँचीको एक कार्यक्रममा व्यस्त थिए । तर, उनी प्रहरीलाई छल्दै सभामुख देवराज घिमिरेसँग भैरहवासम्म आएपनि त्यहाँबाट फरार रहँदै आएका छन् । 

उनी भारतमा लुकेको हुनसक्ने आशंकासहित प्रहरीको एक टोली यतिबेला भारत पुगेको छ । रायमाझी फरार भएको ११ दिन बितिसक्दा समेत पक्राउ पर्न सकेका छैनन् । बरु उनले एमाले नेतृत्वलाई नै घात गरेको र अनुसन्धानमा सघाउनुको साटो फरार भएको भन्दै पार्टीले सचिवबाट निलम्बन गरिसकेको छ । प्रहरीले साझमाझीका छोरा सन्दीपलाई भने वैशाख २० मै पक्राउ गरेको थियो । 

यस्तै इन्द्रजित राईका बाबुछोराविरुद्ध पक्राउ पुर्जी जारी भएपछि प्रहरीले इन्द्रजितलाई वैशाख १९ मा पक्राउ गरेको थियो । नक्कली शरणार्थी प्रकरणमा राजनीतिक नेतृत्वसँग जोडिएर पक्राउ परेका इन्द्रजित नै पहिलो पात्र थिए । सोही प्रकरणमा राईका छोराको समेत कनेक्सन देखिएर पक्राउ पुर्जी जारी भएपछि उनी आइतबारसम्म पक्राउ पर्न नसकेका हुन् । 

याे पनि

टोपबहादुरको पत्र बुझाउने मान्छे खोज्न सीआइबीले लग्यो सिंहदरबारबाट सीसीटिभी फुटेज

पूर्वसांसद आङटावा शेर्पाविरुद्ध पक्राउ पुर्जी जारी

पूर्व गृहमन्त्री ‘बादल’का छोरा प्रतिकविरुद्ध पक्राउ अनुमति

डा.इन्द्रजितका छोरा नीरज राईविरुद्ध पक्राउ पुर्जी जारी

यस्तै पछिल्लो पटक पूर्वगृहमन्त्री रामबहादुर थापा बादलका छोरा र पूर्वसांसद आङ्टावा शेर्पाविरुद्ध पक्राउ पुर्जी जारी भएको छ । इन्द्रजित पक्राउ परेपछि अनुसन्धान गर्दा प्रतीक थापा पनि उक्त घटनामा संलग्न रहेको प्रमाण भेटिएसँगै थापाविरुद्ध पक्राउ पुर्जी जारी भएको प्रहरीले जनाएको छ । प्रतीकले यसअघि विज्ञप्ति निकालेर उक्त घटनामा आफ्नो नाम जोडिएको भन्दै आपत्ति जनाएका थिए ।

यस्तै आङटावा २०७० मा रामेछाप–१ बाट संविधान सभा सदस्यमा निर्वाचित शेर्पा कांग्रेसको महाधिवेशन प्रतिनिधि हुन् । सो प्रकरणमा पक्राउ थुनामा रहेका केशव दुलाल र सानु भण्डारीसँग आङटावाले हिरासतमा पुगेर भेट गरेका थिए । 

भेटमा शेर्पाले आरोपीहरूलाई बयान गर्दा पूर्व गृहमन्त्री बालकृष्ण खाँणको नाम नलिन आग्रह गरेको अनुसन्धानमा संलग्न प्रहरी अधिकारीहरू बताउँछन् । दुलाल र भण्डारी २०७९ चैत १२ देखि हिरासतमा छन् । 

हिरासतमा गएर शेर्पाले कांग्रेसका केन्द्रीय सदस्य एवं पूर्व गृहमन्त्री बालकृष्ण खाँणले आरोपीहरूसँग लिएको रकम फिर्ता गर्ने आश्वासन दिएको प्रहरीको भनाइ छ ।

अहिलेसम्म नक्कली भुटानी शरणार्थी प्रकरणमा पूर्वगृहमन्त्री बालकृष्ण खाँण, सचिव टेकनारायण पाण्डे, इन्द्रजित राईलगायत १२ जना पक्राउ परिसकेका छन् । 

नक्कली भुटानी शरणार्थी प्रकरणमा छानबिन सुरु भएपछि जनस्तर तथा राजनीतिक दलकै तर्फबाट निष्पक्ष छानबिन र दोषीमाथि कारबाहीको माग गर्दै सरकारलाई दबाब बढिरहेको छ ।