हेटौंडा बस दुर्घटना : घाइते एक जनाकाे थप उपचारका लागि भरतपुर रिफर
मकवानपुर । हेटौंडामा भएको यात्रुवाहक बस दुर्घटनाका घाइते एक जनालाई थप उपचारका लागि भरतपुर रिफर गरिएको छ । पूर्व पश्चिम राजमार्ग अन्तर्गत हेटौंडा उपमहानगरपालिका वडा नम्बर-११ नवलपुरमा भएको बस दुर्घटनाका घाइते मध्ये एक जनालाई थप उपचारका लागि भरतपुर पठाइएको जिल्ला प्रहरी कार्यालय मकवानपुरले जनाएको छ ।
प्रहरीका अनुसार गम्भीर घाइते भएका महोत्तरी जलेश्वर नगरपालिका १ बस्ने ३२ वर्षीय राकेश पाण्डेको थप उपचारका लागि भरतपुर रिफर गरिएको छ । उनको टाउकोमा गम्भीर चोट लागेको प्रहरीले जनाएको छ ।
नारायणगढबाट हेटौंडातर्फ आउँदै गरेको ना ६ ख ९८०४ नम्बरको यात्रुबाहक बस शुक्रबार दिउँसो १ बजे अनियन्त्रित भएर दुर्घटना भएको थियो । बस दुर्घटनामा ५२ जना यात्रु घाइते भएको प्रहरीले जनाएको छ । घाइते मध्ये ३० जनाको हेटौंडा अस्पताल र २१ जनाको चुरेहिल अस्पतालमा उपचार भइरहेको जिल्ला प्रहरी कार्यालय मकवानपुरका प्रमुख प्रहरी उपरीक्षक बामदेव गौतमले जानकारी दिए ।