मुद्दती निक्षेपको तीन महिने व्यवस्था खारेज गर्न सीबीफीनको माग
काठमाडौँ । बैंक तथा वित्तीय संस्था परिसंघ नेपाल (सीबीफीन) ले छोटो अवधिको मुद्दती बचतको व्यवस्था खारेज गर्न केन्द्रीय बैंकसँग माग गरेको छ । तीन महिने जस्तो छोटो अवधिको निक्षेपलाई समेत मुद्दतीमा गणना गर्न पाउने व्यवस्थाले बचत निक्षेप समेत मुद्दतीमा रुपान्तरण भइरहेको र सो कारणले बैंक तथा वित्तीय संस्थाहरुको कस्ट अफ फन्ड बढिरहेको सीबीफीनको भनाइ छ ।
धेरै छोटा अवधिका मुद्दती निक्षेपको व्यवस्थाले दीर्घकालीन कर्जा विस्तारमा समेत अवरोध सृजना गरिरहेको बताउँदै सीबीफीनले यस्तो व्यवस्थालाई हटाउन मनासिब देखिएको बताएको हो ।
हाल मुद्दती निक्षेपमा न्यूनतम तीन महिनादेखि ६ महिना, १ वर्ष, २ वर्ष वा बहुवर्षसम्म बचत गर्न सकिने व्यवस्था छ । साधारण बचतको भन्दा धेरै ब्याजदर प्रदान गर्नुपर्ने हुँदा बैंकहरुले लामो अवधिको मुद्दती बचत चाहेका हुन् ।
हाल बैंकहरुले बचतमा न्यूनतम ७ प्रतिशतदेखि अधिकतम १०.९८ प्रतिशतसम्म ब्याज प्रदान गरिरहेका छन् । जसले संस्थाको कस्ट अफ फन्ड (लगानी) बढेको भन्दै बैंकहरुले छोटो अवधिका बचतहरुलाई साधारण बचतको रुपमा गणना गर्न माग गरेको हो ।