विराटनगर । अवैध रूपमा २० किलो चाँदी लिएर काठमाडौँ हिँडेका दुई युवा पक्राउ परेका छन् ।  

उनीहरुलाई प्रहरीले मंगलबार पक्राउ गरेको हो । 

पक्राउ पर्नेमा विराटनगर महानगरपालिका ५ का २५ वर्षीय रोहितकुमार यादव र विराटनगर बस्दै आएका ३७ वर्षीय शेचन मानन्धर रहेका छन् । उनीहरुलाई बिपी राजमार्ग अन्तर्गत गोलन्जोर गाउँपालिका ५ को सिन्धुली गढी प्रहरी चौकीले पक्राउ गरेको हो । 

उनीहरुले प्रयोग गरेको ०१–०२५ च १०६९ नं को निजी कार पनि नियन्त्रणमा लिइएको प्रहरीले जनाएको छ । कारको पछाडि सिटमुनि लुकाएर २० किलो चाँदी राखेको फेला परेको थियो ।

उक्त चाँदीको मूल्य २४ लाख ६१ बराबरको छ । नियन्त्रणमा लिइएको चाँदी र सवारी साधनलाई आन्तरिक राजश्व कार्यालयमा पठाइने प्रहरीले जनाएको छ ।