काठमाडौँ । जमलस्थित सांस्कृतिक संस्थान (नाचघर) मंगलबार संगीतमय भयो । नातिकाजी स्मृति समाज र सांस्कृतिक संस्थानको संयुक्त आयोजना रहेको ‘नातिकाजी संगीत श्रवण साँझ’मा विभिन्न कलाकारले नाजिकाजीद्वारा स्वर तथा संगीतबद्ध गीतहरू गायर उनको सम्झना गरे । संगीत महर्षि नातिकाजी श्रेष्ठलाई उनकै गीत संगीतबाट स्रष्टाले सम्झिएका हुन् ।

कार्यक्रममा अग्रजदेखि नयाँ पुस्तासम्मका गायक गायिकाले नातिकाजीका डेढ दर्जन गीत प्रस्तुत गरे । नातिकाजी स्मृति समाजका अध्यक्ष तथा वरिष्ठ संगीतकार शम्भुजीत बासकोटाको सभापतित्व रहेको साँझको संगीत संयोजन तथा परिचालनमा अमूल कार्की ढलीले गरेका थिए । प्रत्यक्ष वाद्यवादनमा कलाकारले गीत प्रस्तुत गरेको कार्यक्रमको सुरुवात ओम हरहर महादेव गीतमा समूह गायनसँगै भएको थियो ।

कार्यक्रममा निशा देशार, प्रश्ना शाक्य, धर्म मुनिकारलगायतले नेपाल भाषामा सझ्याँ टिकी झ्याँ प्रस्तुत गरे । यसपछि अमूल कार्की ढलीले शुभकामना गीतको धुन सुनाए ।

त्यस्तै मञ्जु थापाले कालीपारे दाइ कति राम्रो, पूजा देवकोटा, सुप्रिम मल्लले हासौं खेलौं रोदीमा बसेर, माण्डवी त्रिपाठीले पहाड बसी गीत प्रस्तुत गरे ।

नातिकाजीद्वारा संगीतबद्ध चलचित्रका गीतहरू जसमा गायिका प्रश्ना शाक्यले फुलको थुँगा, रामकृष्ण ढकालले लुक लुक लाग्यो मलाई र कस्तुरीमा बास आउँछ, अनु चौधरीले वनमा फुल्यो फूलैफूल गीत प्रस्तुत गरेका थिए । समारोहमा लोकगीततर्फ आनन्द कार्कीले पर लैजाउ फुलहरू, सुरेश लामाले सपना भुलाई सारा, सञ्जय तुम्रुकले आजै र राति, देवीका बन्दनाले उकाली ओरालीमा, रचना रिमालले यस्तो पनि हुँदो रैछ गीत गाउँदै दर्शक रिझाएका थिए ।

कार्यक्रममा विकास राणा, वेनिशा पौडेल, स्मिता दाहाल, शिव परियार मेचु धिमाल लगायतले समेत सांगीतिक प्रस्तुति दिएक थिए । 

कार्यक्रममा नातिकाजी स्मृति समाजका अध्यक्ष तथा वरिष्ठ संगीतकार शम्भुजीत बासकोटाले नेपाली संगीतमा नातिकाजीको सिर्जना नयाँ पुस्तामा पुस्तान्तरण गर्न यो सांगीतिक कार्यक्रम आयोजना गरिएको धारणा राखे ।