पूजा भट्ट एक जमानाकी निकै चर्चित अभिनेत्री थिइन् । उनको जन्म फिल्मी परिवारमा भएको थियो । पूजाले १७ वर्षको उमेरमा नै अभिनयमा डेब्यु गरेकी थिइन् । १९ वर्षको हुँदासम्म उनी फिल्म उद्योगकी ठुलो स्टार बनिसकेकी थिइन् । तर २४ औँ वसन्तमा प्रवेश गरेपछि भने उनले अभिनयबाट टाढै बस्ने निर्णय गरिन् । 

पूजा भट्ट पछिल्लो समय बिग बसको ओटीटी सिजन २ मा प्रतिस्पर्धीको रूपमा सहभागी भएपछि पुनः चर्चामा आएकी छिन् । यति बेला पूजासँग जोडिएका विवाद पनि पुनः चर्चामा आए ।

कार्यक्रमबाट बाहिरिएपछि पूजाले सिद्धार्थ कननसँगको कुराकानीमा अभिनय छोड्ने निर्णयबारे खुलेर कुरा गरिन् । 

स्मरण रहोस्, पूजाले आफ्ना बुवा महेश भट्टको फिल्म ‘ड्याडी’ बाट बलिउडमा डेब्यू गरेकी थिइन् । यो फिल्म बक्स अफिसमा हिट भयो । ड्याडीपछि पूजाले ‘दिल हे कि मानता नहीं’ र ‘सडक’ मा अभिनय गरिन् । ती फिल्म पनि सुपर हिट रहे । 

१९ वर्ष हुञ्जेल पूजा भट्ट सुपरस्टार बनिसकेकी थिइन् । तर २४ वर्षको उमेरमा नै उनले अभिनय छोड्ने निर्णय गरिन् । तर उनी फिल्मी उद्योगबाट भने टाढा रहन सकिनन् । अभिनय छोडे पनि उनले २५ वर्षमा आफ्नै प्रोडक्सन हाउस सुरु गरिन् । 

उनले उक्त अन्तरवार्तामा २५ वर्षको उमेरमा अभिनय छोडेर निर्देशक बन्ने निर्णय गरेको बताइन् । उनले भनिन्, ‘२५ वर्षको उमेरमा मैले आफ्नै प्रोडक्सन हाउस सुरु गरेँ र ‘तमन्ना’ बनाएँ । यसका लागि मैले आफ्नो पहिलो नेशनल अवार्ड पाएँ । यसले मलाई आत्म सन्तुष्टि दिलायो । त्यसपछि मैले काजोलसँग ‘दुस्मन’ र त्यसपछि ‘जख्म’ जस्ता फिल्म बनाएँ, जसलाई असाध्यै रुचाइयो ।’