एमाले कर्णाली प्रदेश अधिवेशनको तयारी पुरा, तस्बिरमा हेर्नुहोस्
सुर्खेत । नेकपा एमाले कर्णाली प्रदेशको अधिवेशनको तयारी पुरा गरिएको छ । आज दिउँसो १ बजे एमाले अध्यक्ष केपी शर्मा ओलीले उद्घाटन गर्ने अधिवेशनका लागि मञ्च, सजाउनेदेखि सरसफाइ गर्ने कार्यहरू चलिरहेका छन् ।
वीरेन्द्रनगरको सिटी हलमा आयोजना गर्न लागिएको अधिवेशनका लागि सिटी हल भित्र सम्पूर्ण तयारी सम्पन्न गरिएको हो । उद्घाटन सत्रमा करिब पाँच हजारको सहभागिता रहने बताइरहेको एमाले प्रदेश कमिटीले हलभित्र नअट्ने देखिए पनि हलको बाहिर फिल्डमा पनि टेन्ट टाँगेर कुर्सीको व्यवस्थापन गरिएको छ ।
अध्यक्ष केपी ओली काठमाडौँबाट नेपालगन्ज विमानस्थलमा उत्रने छन् । त्यसपछि उनी कोहलपुर रत्नराजमार्ग हुँदै सुर्खेत आउने कार्यतालिका रहेको एमाले प्रदेश अध्यक्ष विनोदकुमार शाहले जानकारी दिए ।
ओलीसँग महासचिव शङ्कर पोखरेल पनि आउनेछन् । कार्यक्रमको स्वभा बढाउनका लागि अध्यक्ष ओलीको फोटोहरू हल बाहिर राखिएको छ । यतिबेला हलमा आइसकेका कार्यकर्ताहरू ओलीको फोटोसँग फोटो खिचिरहेका भेटिन्छन् भने कोही हल बाहिर गफिरहेका छन् ।
अधिवेशनका लागि सुरक्षा व्यवस्थालाई कडा पारिएको छ भने एमालेले ४० जना स्वयम् सेवक समेत खटाइरहेको युवा नेता रुद्र शाहीले जानकारी दिए ।
बुधबार र बिहीबार हुने अधिवेशन सकेसम्म सर्वसम्मत तरिकाले सम्पन्न गर्ने प्रयास गरिए पनि नेताहरूको आ–आफ्ना अडानका कारण निर्वाचन हुने सम्भावना प्रबल रहेको नेताहरू बताउँछन् । नेतृत्वको लागि यहाँ यामलाल कँडेलको टिमका गुलाबजंग शाह, गोरख बोगटीको टिमबाट मीनबहादुर शाही र पूर्व सभामुख राजबहादुर शाहीको नाम चर्चामा छ।