लिभरपुल । लिभरपुलका म्यानेजर योर्गेन क्लपले प्रिमियर लिगमा टोटनह्याम विरुद्धको खेल पुनः खेलाउनु पर्ने बताएका छन् । लुइस डियाजको गोललाई भिडियो एसिस्टेन्ट रेफ्रीले गल्ती गर्दै अस्वीकार गरेपछि उनले यस्तो बताएका हुन् ।
शनिबार भएको खेलमा  डियाजको गोललाई गलत रूपमा अफसाइड करार गर्दा भीएआर रेफ्री ड्यारेन इङ्गल्याण्ड र सहायक ड्यान कुकले हस्तक्षेप गरेका थिएनन्।  ९६ औँ मिनेटमा जोएल माटिपले आत्मघाती गोल गरेपछि लिभरपुल खेलमा २–१ ले पराजित भएको थियो ।

‘यस्तो कहिल्यै भएको थिएन, त्यसैले मलाई लाग्छ कि खेल पुनः खेलाइनु नै सही कुरा हो,’ क्लपले भने। तर प्रिमियर लिगले खेल पुनः खेलाउने विषयमा विचार गर्ने कुनै सम्भावना नभएको बीबीसीले जनाएको छ ।

साथै लिभरपुलबाट पनि औपचारिक अनुरोध आएको छ कि छैन भन्ने स्पष्ट छैन। क्लबले प्रिमियर लिगलाई रिप्लेको लागि आग्रह गरेको छ कि छैन भनेर सोध्दा क्लपले भने, ‘यो समयमा हामी अझै पनि हामीसँग भएको जानकारी अध्ययन गरिरहेका छौँ।’  

रेफरीहरूको निकाय पीजीएमओएलले मंगलबार अफसाइडलाई लिएर म्याच अधिकारीहरू बिचको छलफलको अडियो सार्वजनिक गरेको थियो। अडियोमा रेफ्री इङ्ल्यान्डले पनि आफ्नो गल्ती थाहा पाएको सुन्न सकिन्छ ।
क्लपले भने, ‘अडियोले केही परिवर्तन भएको छैन। यो एक स्पष्ट गल्ती हो। यसको समाधान हुनुपर्छ। त्यो भने पुनः खेल्नु हो । तर सायद यो सम्भवतः हुनेछैन।