राप्ती स्वास्थ्य विज्ञान प्रतिष्ठानमा बालरोग विशेषज्ञको अभाव
सोमबार, २५ मङ्सिर २०८०, २० : १६
बुटवल । दाङको राप्ती स्वास्थ्य विज्ञान प्रतिष्ठान घोराहीमा बाल रोग विशेषज्ञ नहुँदा बच्चाहरूको उपचारमा समस्या भएको छ ।
करिब ६ महिनादेखि बाल रोग विशेषज्ञ नहुँदा प्रतिष्ठानमा बालबालिकाको जटिल उपचारका लागि बुटवल, नेपालगन्ज धाउनु परेको स्थानीयको गुनासो छ ।
अहिले बच्चाको उपचारका लागि एनआईसीयु, पीआईसीयुको सुविधा भए पनि विशेषज्ञ चिकित्सक नहुँदा उपलब्धिविहीन भएको छ ।
दाङ, लमहीका यादव थारुले राप्ती स्वास्थ्य विज्ञान प्रतिष्ठानमा बालरोग विशेषज्ञ नभएकै कारण आफूले बच्चालाई उपचारका लागि लुम्बिनी प्रादेशिक अस्पतालमा ल्याएको बताए ।
प्रतिष्ठानका प्रवन्धक राजेन्द्र न्यौपानेले बाल रोग विशेषज्ञ ल्याउन पहल भइरहेको रातोपाटीलाई बताए । उनले पुस १ गते हाजिर हुने गरी विशेषज्ञ डाक्टर ल्याउने तयारी भइरहेको बताए ।