भर्ना अभियानले नछोएकाहरू जो सिंहदरबार नजिकै बस्छन्

सोमबार, १७ वैशाख २०७५, १४ : ००

भर्ना अभियानले नछोएकाहरू जो सिंहदरबार नजिकै बस्छन्

सोमबार, १७ वैशाख २०७५

काठमाडौं । त्रिपुरेश्वरको बागमती नदीसँगै रहेको बस्तीमा बालबालिकाहरू सडकमा खेल्दै गरेका थिए ।

बागमतीको दुगन्र्धको वास्तै नगरी कोही बिनाचप्पल हिले सडकमा उफ्रिँदै थिए त कोही चिसो भुइँमा बसेर ढुङ्गाले माटो पिस्दै थिए ।

यो माटोको थुप्रोमा उफ्रिँदै गरेकी सुस्मिता माझी हुन् ।

५ वर्ष लागिन् । उनलाई खेल्नकै धुन छ । खुट्टामा चप्पल छैन । बसाइ देशकै राजधानीमा भए पनि सुस्मिताको दैनिकी कुनै विकट ठाउँको बालबालिकाको भन्दा कम छैन । हिलो, फोहोर सडकमा खेल्नु उनको दैनिकी नै हो ।

भर्ना अभियान देशभर चल्यो तर सिंहदरबार नजिकै रहेको बागमतीको किनारमा बस्ने सुस्मितालाई यो अभियानले छुन सकेन ।

उनको स्कुल जाने उमेर त भयो तर उनलाई विद्यालयमा भर्ना गरिएको छैन ।

बागमतीको किनारमा बस्दै आएका माझी परिवारलाई दैनिकी धान्न नै निकै हम्मेहम्मे परेको छ । छोरीको भर्नाका लागि कहाँ पैसा पाउनु ।

टिनको छानो, त्यसलाई अड्याउन बाँसको टेको लगाइएको, चिसो भुइँ, त्यसमा पनि अँध्यारो देखिने त्यो छाप्रोले नै माझी परिवारको अवस्था बताइरहेको थियो ।

सुस्मिताका बाबा काम गर्न गएका रैछन् । आमासँग हामीले कुरा गर्ने प्रयत्न ग¥यौं, बोल्न मानिनन् । आफ्नो पीडा अरूलाई किन भन्नु भन्ने सोचले पनि बोलिनन् होला । तर उनको झुपडीले सबै कुरा बताइरहेको थियो ।

गरिबीकै कारण छोरीलाई विद्यालय पठाउन नसकेको कुरा मुखले भन्न नसके पनि स्पष्ट देखिथ्यो ।

शान्ता दर्जीका कक्षा ४ र कक्षा १० मा अध्ययन गर्ने दुईजना छोरी छन् । दुवै जना अहिले स्कुल गएका छैनन् ।

काभ्रे घर बताउने दर्जी विगत १० वर्षदेखि बागमती किनारमा बस्दै आइरहेकी छिन् । शान्ताका श्रीमानले ठेलामा मम बेच्न थालेको केही दिन भएछ ।

ज्याला मजदुरीबाट दैनिकी चलाउँदै आएकी शान्ताले आर्थिक अभावकै कारण भर्ना गर्न नपाएको गुनासो सुनाइन ।

सरकारले निःशुल्क भर्ना अभियान सञ्चालन गरेको छ भन्ने कुराको बारेमा शान्ताले पनि सुनेकी रैछिन् ।

तर कहाँ, कसरी भर्ना हुन्छ भन्ने बारेमा उनलाई थाहा छैन । २ जना छोरी भर्ना गर्नका लागि चानचुन ७ हजार लाग्ने शान्तले बताइन् ।

तर शान्तका लागि ७ हजार जुटाउन निकै मुस्किल छ । २ छोरी एक जना १३ महिनाको छोरा अनि श्रीमान/श्रीमती गर्दा खाने मुख नै ४ जनाको छ ।

काठमाडौं जस्तो ठाउँमा राम्रै काम गर्नेलाई त यति परिवार धान्न निकै सकस पर्छ भने शान्तालाई झन् कति गाह्रो भएको होला । छोरी पढ्ने विश्व निकेत विद्यालयमा वैशाख २६ सम्म भर्ना गर्ने समय छ रे । त्यो

समयसम्म ७ हजार जुट्यो भने शान्ताका दुई छोरीले पढ्न पाउने छन्, होइन भने उनीहरूको अध्ययन यहीँ पूर्णबिराम लाग्ने छ ।

यो गुलाबी कलरको टिसर्ट लगाउने उनै शान्ताकी छोरी सुजता हुन् भने अर्की अस्मिता नेपाली हुन् ।

सुजता नेपाली अहिले १० वर्षकी भइन् । यो वर्ष पास भएर विश्व निकेतन विद्यालयमा कक्षा ४ मा पुगेकी छिन् तर स्कुल जान सकिनन् ।

सुजताले भनिन्– ‘सँगैको साथीको भर्ना गरेको छ, आफ्नो छैन ।’

भर्ना गरेका सबै साथीको हातमा नयाँ किताब छ, सुजताको हातमा छैन ।

किताब नहँुदा पढ्न नै गाह्रो हुने भएको हुँदा स्कुल नै जान छाडेको सुजताले बताइन् ।

उनको पनि आजकाल दैनिकी खेलेरै बित्छ ।

सँगैका साथीहरू पास भएर नयाँ कक्षामा रमाउँदै स्कुल जान्छन् ।

सुजता भने भर्ना नगरेकै कारण स्कुल जानबाट वञ्चित भएकी छिन् ।

यस्तै अस्मिता ७ वर्षकी भइन् । उनी यो वर्ष पास भएर नर्सरीमा त पुगिन् तर स्कुल जान पाइनन् ।

अस्मिताले पनि भर्ना नगरेकै कारण स्कुल नगएको बताइन् ।

“हामी सबैको इच्छा, अनिवार्य निःशुल्क आधारभूत शिक्षा” भन्ने नाराका साथ वैशाख ५ गतेदेखि भर्ना अभियान सुरु गरिएको छ । शिक्षा, विज्ञान तथा प्रविधि मन्त्री गिरिराजमणि पोखरेलले ३ लाख बालबालिकालाई विद्यालय भर्ना गर्ने, त्यो पनि वैशाख १४ भित्रमै भनेका थिए ।

भर्ना सुरु भएको केही दिन त कसैलाई प्रधानमन्त्रीले बोके त कसैलाई शिक्षामन्त्री आफैले विद्यालय भर्ना गराए । यता महानायक राजेश हमालले पनि अविभावकको जिम्मेवारी लिँदै बालबालिकालाई विद्यालय भर्ना गराए । तर काठमाडौं र ललितपुरको सिमानामा पर्ने बागमती बस्तीको बालबालिकाको हकमा भने सरकारको नारा लागू हुन सकेन ।

कसकसले गरे अभिभावकत्व ग्रहण

कर्णालीको राराबाट सुरु भएको भर्ना अभियानमा प्रधानमन्त्री केपी शर्मा ओलीले एक बालिकालाई विद्यालय भर्ना गराउँदै अभियानको उद्घाटन गरेका थिए । यस्तै वैशाख ५ गते सिरहामा दुई जना बालबालिका,

वैशाख १ गते मुगुमा एक बालकलाई विद्यालय भर्ना गराएका छन् ।

वैशाख ५ गते नै शिक्षा तथा विज्ञान प्रविधि मन्त्री गिरिराजमणि पोखरेलले धुनषाका ४ बालबालिकालाई विद्यालय भर्ना गराई अभिभावकत्व ग्रहण गरेका थिए ।

प्रदेश नम्बर ३ का सामाजिक विकास मन्त्री युवराज दुलाल, ३ नम्बर प्रदेशकै भूमि व्यवस्था, कृषि तथा सहकारी मन्त्री दावा दोर्जे लामा, प्रदेश नम्बर २ का सामाजिक विकास मन्त्री नवलकिशोर शाह, ४ नम्बर प्रदेशका युवा तथा खेलकुद मन्त्री जगत विश्वकर्मा, महानायक राजेश हमाल, हाँस्य कलाकार केदारनाथ घिमिरे माग्ने बुढालगायतले २०७५ सालको भर्ना अभियानमा अभिभावकत्व ग्रहण गरेका छन् ।

शिक्षा विभागका महानिर्देशक बाबुराम पौडेलको अनुसार भर्ना अभियान सञ्चालन भइरहेको हुँदा कति बालबालिका विद्यालय भर्ना भए भन्ने कुराको जानकारी नआएको बताए ।

हाल कक्षा १ देखि कक्षा ८ सम्म ३ लाख १३ हजार र कक्षा १ देखि ५ सम्म अध्ययन गर्ने ८८ हजार बालबालिका विद्यालयबाहिर रहेको सरकारको तथ्याङ्क रहेको छ ।

यो पनि पढ्नुहोस्

खबर पढेर तपाईलाई कस्तो महसुस भयो ?

प्रतिक्रिया

लेखकको बारेमा

अञ्जु तामाङ

तामाङ रातोपाटीका लागि स्वास्थ्यसँग सम्बन्धित समाचार लेख्छिन् ।

लेखकबाट थप