१६ लाख रुपैयाँ लुटियो भन्दै घरमा लुकाउने पक्राउ
आइतबार, ०१ भदौ २०७६, १७ : ०१
काठमाडौँ । १६ लाख रुपैयाँ लुटियो भन्दै प्रहरीलाई खबर गर्ने एक युवा उक्त रकमसहित पक्राउ परेका छन् ।
न्युरोडका व्यवसायी दीपक गोयलले आइतबार आफ्नै कामदार भारत घर भएका मनिष कुमार साहलाई बजारबाट उठेको रकम बैैङ्कमा जम्मा गर्न पठाएका थिए ।
तर, साहले उक्त रकम बैङ्कमा जम्मा गर्नुको साटो लुटिएको भन्दै प्रहरीलाई फोन गरेका थिए ।
तत्कालै महानगरीय प्रहरी परिसर काठमाडौँको टोलीले साहलाई नियन्त्रणमा लिएर सोधपुछ गर्दा उनले आफू बस्ने कोठामा टिभी पछाडी लुकाएको बयान दिएका थिए ।
उनको बयानका आधारमा डल्लुस्थित साहको कोठामा प्रहरी पुगेर १६ लाख रुपैयाँ बरामद गरेको परिसरका प्रवक्ता होविन्द्र वोगटीले रातोपाटीलाई बताए ।
यसबारे थप अनुसन्धान भइरहेको प्रहरीले जानकारी दिएको छ ।