वीरेन्द्रनगर नगरपालिका सुकुम्बासी समस्या समाधानका लागि अग्रसर
आइतबार, १२ चैत २०७९, १२ : ०२
सुर्खेत । सुर्खेतको वीरेन्द्रनगर नगरपालिका भूमिहीन, दलित, अव्यवस्थित बसोबासी र सुकुम्बासी समस्या समाधानका लागि अग्रसर भएको छ । त्यसका लागि सुरुवाती चरणमा नापजाँचको काम सुरु भएको छ । नगरपालिकाका नगरप्रमुख मोहनमाया ढकाल (भण्डारी) का अनुसार वडा नं. १६ नापजाँचको कार्य सुरु भएको हो ।
क्रमशः सबै वडामा नापजाँच कार्य गर्ने र त्यसपछि वास्तविकताका आधारमा समस्या समाधान गरिने उनले बताइन् । ‘वीरेन्द्रनगरलाई व्यवस्थित सहरको रुपमा विकास गर्ने हाम्रो लक्ष्य र चुनावी प्रतिबद्धता थियो,’ ढकालले भनिन्, ‘सोही अनुसार हामी निरन्तर लागिरहेका छौँ ।’
ढकालले सुकुम्बासी समस्या समाधानको कार्य पनि जिम्मेवारीपूर्ण रुपले गरिने बताइन् । वीरेन्द्रनगर नगरपालिकाभित्र १४ हजार जनाको फारम संकलन भएको ढकालको भनाइ छ ।