इटालियन सिरिए फुटबल : मिलानसँग हार्यो लाजियो
काठमाडौँ । इटालियन सिरिए फुटबलको शनिबार राति खेलिएको खेलमा अंक तालिकाको दोस्रो स्थानमा आसिन लाजियो पराजित भएको छ । एसी मिलानले लाजियोलाई २—० गोलले हराएको हो ।
मिलानले दुबै गोल पहिलो हाफमै गरेको थियो । मिलानको जितमा इस्माइल बेनासेर र थेओ हर्नान्डेजले १-१ गोल गरे ।
खेल सुरु भएको १७औं मिनेटमा इस्माइलले गोल गर्दै मिलानलाई सुरुआती अग्रता दिलाएका थिए । खेलको २९औं मिनेटमा हर्नान्डेजले गोल गर्दै मिलानलाई २–० को जित दिलाए ।
हारका बावजुद लाजियो अंक तालिकाको दोस्रो स्थानमा यथावत छ । लाजियोले ३४ खेलबाट ६४ अंक बटुलेको छ । मिलानले भने ३४ खेलमा ६१ अंक जोडेको छ । मिलान तालिकाको पाँचौं स्थानमा छ ।
सिरिएको उपाधि भने नापोलीले जित्ने निश्चित भइसकेको छ । नापोलीले ३३ खेलबाट ८० अंक जोडेको छ । शनिबार राति नै भएको अर्को खेलमा इन्टर मिलानले रोमालाई २—० गोलले हरायो ।
इन्टरका लागि ३३औं मिनेटमा फेड्रिको डिमार्कोले पहिलो गोल गरेका थिए । खेलको ७४औं मिनेटमा प्रभावशाली खेलाडी रोमेलु लुकाकुले अर्को गोल थप्दै इन्टरलाई सहज जित दिलाए ।
३४ खेलबाट ६३ अंक जोडेको इन्टर तालिकाको चौथो स्थानमा उक्लिएको छ । रोमा भने ३४ खेलबाट ५८ अंक जोड्दै सातौं स्थानमा छ ।