चालू आर्थिक वर्षमा ७४१ विदेशी नागरिकलाई श्रम स्वीकृत
आइतबार, १४ जेठ २०८०, १६ : ११
काठमाडौँ । सरकारले चालू आर्थिक वर्ष २०७९/८० को फागुन महिनासम्ममा ७४१ विदेशी नागरिकलाई श्रम स्वीकृत दिएको छ । आर्थिक सर्वेक्षणअनुसार उक्त सङ्ख्याका विदेशी नागरिकलाई श्रम स्वीकृति दिनुका साथै ७९५ जनालाई पुनः श्रम स्वीकृति दिइएको छ ।
गत आर्थिक वर्ष २०७८/७९ मा यो सङ्ख्या क्रमशः ६८६–६०६ थियो । २०७८/७९ को आर्थिक वर्षभर ९५० जना विदेशी नागरिकले श्रम स्वीकृति लिएका थिए भने १ हजार २३१ जनाको श्रम स्वीकृति नवीकरण गरिएको थियो ।
यस्तै, यस अवधिमा १ हजार ६९२ श्रम प्रतिष्ठानको निरीक्षणका साथै न्यूनतम पारिश्रमिक कार्यान्वयनको अनुगमन गरिएको आर्थिक सर्वेक्षणमा उल्लेख छ । यस अवधिमा ३१ श्रम प्रतिष्ठानलाई श्रमिक आपूर्तिकर्ताको इजाजत पत्र प्रदान गरिएको छ भने २६९ कम्पनीको इजाजत पत्र नवीकरण समेत गरिएको छ ।