१०० किलोवाट विद्युतीय गाडी चढ्नेहरु आम नागरिक होइनन् : अर्थमन्त्री डा.महत
काठमाडौँ । अर्थमन्त्री डा.प्रकाशशरण महतले विनियोजित बजेटले विद्युतीय गाडीमा कर वृद्धि गरिएकोमा तीव्र विरोध भएको भन्दै आफूले वस्तुपरक भएर करका दर हेरफेर गरेको बताएका छन् ।
सोमबार प्रतिनिधिसभामा सांसदहरुको प्रश्नको जवाफ दिँदै मन्त्री महतले भने, ‘माननीयहरूले आम सर्वसाधारण जनताले चढ्ने गाडीमा कर वृद्धि गरेर उच्च वर्गले चढ्ने गाडीको कर किन घटाइयो ? भनेर प्रश्न गर्नु भएको छ । तर १०० किलोवाटको गाडी चढ्नेहरु आम नागरिक होइनन् । यसैपनि विद्युतीय गाडी महँगो छ । यो वा त्यो हेरेर विद्युतीय गाडीमा कर परिमार्जन नगरेर व्यवहारिक पक्षलाई हेरेर ५ वर्गमा वर्गीकरण गरेर गाडीमा कर व्यवस्थित गरिएको हो ।’
अर्थमन्त्री डा.महतले विद्युतीय गाडीमा प्राविधिक पक्षमा चलखेल गरेर कर छली गर्न सकिने अवस्था समेत रहेको बुझिएकाले आफूले त्यसलाई रोक्न पनि करलाई व्यवस्थित गरिएको बताए ।